Tur departamento di polis lo muda pa Brown Building

ORANJESTAD – A corto plazo tur departamento di polis (KPA) lo muda pa un edidicio central na Wayaca, dilanti aeropuerto. Informacion cu NoticiaCla.com tin, ta cu ta trata di Brown Building cu tabatin clientenan manera Fedex y Insel Air un tempo. Ministerio di husticia no kier a confirma si enberdad ta trata di Brown Building, aunke cu fuentenan ta confirma esaki si. E mandatario di husticia a solamente ‘post’ un mensahe riba e tema riba su pagina di Facebook, sin confirma e sitio.  Tampoco no a haci mencion si di kico ta ‘a corto plazo’ ni cua edificio esaki lo ta. 

EDIFICIO BASHI

Ta conoci cu tin varios edificio bashi actualmente na Wayaca, manera Brown Building y otronan cu ta un posibilidad. Mientrastanto reunionan a tuma lugar cu tur departamento pa coordina e mudamento aki ‘dentro di poco’. e mudamento cu ta bay tuma luga a corto plazo di warda di polis Wilhelminastraat y otro departamentonan di KPA, pa un compleho di edificio central na Wayaca, dilanti di Aeropuerto. “ E reunion a bay den bon ambiente y pasonan concreto a keda tuma pa por logra e mudamento a corto plazo. Entre otro lo traha un caminda di acceso nobo destina special pa patruyanan di Polis. Tambe lo traha un compleho di celnan completamente nobo. Pues pronto lo por duna inicio na e proceso di mudamento pa por conclui esaki a corto plazo” ta e mensahe cu a wordo poni riba Facebook di e mandatario.