Wever: Tin un lista di mas di 20 compania interesa pa tuma refineria over

ORANJESTAD - Prome Minister di Aruba Evelyn Wever a bisa den un comunicado diabierna cu gobierno ya caba tin un lista di 23 persona kendenan a expresa nan interes den e refineria. Gobierno ta repasando tur e documentonan aki pa mira si en realidad esakinan ta personanan of companianan serio cu di berdad por bira partner den e refineria. Tambe lo habri opcion pa otro interesadonan tambe haya oportunidad pa expresa nan interes. Y e comision encarga lo propone e mihonan pa presenta na Gobierno. E mandatario no a revela si ken e persona of companianan interesa aki ta. 

ALTERNATIVA

Den caso cu no tin operador interesa y si realmente un refineria lo no por opera mas na Aruba pa cualkier motibo, e ora lo bay pa fase tres. Fase tres ta pa sondea posibilidadnan pa e area di refineria cu por genera desaroyo economico y crea cuponan di trabou.   

NEGOSACION COMPLICA

“Aworaki no por duna informacion di cuanto tempo mas e negosacionnan pa fase un lo dura. Apesar cu negosacionnan ta andando bon, nan ta keda negosacionnan hopi complica teniendo tambe un contract cu hopi detaye cu ta haci cu lo tuma tempo prome cu sali for di un contract asina. Gobierno di Aruba, manera semper, ta tumando su tempo pa sali di e situacion aki bon y mas lihe posibel pa asina continua cu fase dos y ohala cu pronto Aruba por mira un refineria moderno cu lo crece nos economia y crea cuponan di trabou”, Prome Minister Evelyn Wever-Croes a duna di conoce.