Gobierno kier sali for di contracto cu CITGO mas liher cu ta posibel

ORANJESTAD - Gobierno di Aruba hunto cu Refineria di Aruba (RDA) ta den negosacion cu e compania Citgo pa sali for di e contract mas lihe cu ta posibel. Esaki pasobra nan no kier sigui mas cu e compania. Segun e contract firma cu Citgo pa e Gobierno anterior, pa october 2020 Citgo lo mester a inverti suficiente y rehabilita e refineria pa e por ta operacional. Prome Minister Evelyn Wever-Croes a duna di conoce cu recien Citgo a admiti di no ta posee e fondo pa cumpli cu esaki cu ta duna Gobierno di Aruba e posibilidad pa dos opcion. 

PROME OPCION

E prome opcion ta pa warda october 2020 yega y yama aden un ‘breach of contract’ y bay den corte cu por dura hopi aña. E di dos opcion ta pa evita e perdida di tempo aki den corte y sinta na mesa cu Citgo y purba yega na un areglo pa sali for di e contract aki pa asina Aruba haya e yabi bek di e refineria. Den e negosacionnan cu ta andando, e enfoke ta poni riba e terminal y riba e refineria. E meta ta pa Aruba sali for di e contract aki sin core algun riesgo financiero. 

TRAHADONAN

Pa loke ta trata e preocupacionnan cu tin pa cu e situacion di e trahadonan di e refineria, Prome Minister a enfatisa cu e interes primordial di Gobierno di Aruba ta pa garantisa cu tin trabou pa e trahadonan aki. Na momento cu Citgo sali afo y refineria cay bek den man di Gobierno, mester trahadonan pa keda traha eynan. RDA e ora lo percura pa funcionamento di e terminal na unda cu tin mester di trahado pa traha tanto na e terminal como tambe pa mantencion di e refineria. Cu esaki, Gobierno ta cumpli cu e prome fase di e plan pa nos refineria. 

CITGO NO TA SINCERO

Despues lo cuminsa e di dos fase. Manera ya caba despues cu Prome Minister a reuni cu OFAC na Washington na unda a bira conoci cu Citgo no ta sincero cu Aruba, e mandatario a anuncia e plan di Gobierno pa cu e refineria cu ta consisti den tres fase. E di dos fase ta pa busca operadornan cu ta interesa den nos refineria y conberti e refineria den un refineria moderno technologicamente y cu ta cumpli cu exigencianan di medio ambiente. Un refineria cu ta trata su trahadonan bon y ta cumpli pa paga nan. Un refineria cu ta cumpli cu su obligacionnan cu Gobierno.