STA: Por spera accion den sector di contruccion

ORANJESTAD – Debi na e situacion tenso den mundo di construccion na Aruba, por spera un accion un ora pa otro. Asina presidente di sindicato STA, esta Diego de Cuba a bisa NoticiaCla.com diabierna mainta. Un reunion urgente convoca pa diabierna atardi cu e trahadonan den mundo di construccion bou di WAB (consorcio di companianan di construccion na Aruba manera ALBO, Wegenbouw, Thiel y otronan grandi), mester trece claridad den e asunto. Sea ta opta pa continua cu combersacion pa un contracto colectivo, of ta bay den accion, de Cuba a bisa. Esaki pasobra e trahadonan tin mas di un aña ta warda riba un aumento di salario. 

IMPASSE

E impasse segun de Cuba, ta pa e hecho cu partidonan (sindicato vs WAB no ta hayando otro. Sindicato a manda un proposicion di CAO pa WAB, y WAB na su turno a manda un contra proposicion. Pero segun de Cuba, WAB ‘no kier duna nada’. “Esey ta inaceptabel” de Cuba a sigui bisa e portal aki. Como tal a opta pa reuni cu tur hende diabierna atardi y wak con ta sali afo. 

MEDIADOR

De Cuba a bisa cu mediador di gobierno ta na mesa tambe y awor tin cu bay traha un ‘tussenvoorstel’ pa ‘wak si por sali di e impasse aki’. “E situacion ta uno tenso y por bira un accion un ora pa otro” de Cuba a finalisa bisando. E reunion ta tuma lugar diabierna atardi 5:30pm na Simar.