Problema entre MEP y AVP a termina cu keho serca gobernador

ORANJESTAD – Tratamento di 5 ley den comision central diaranson rapidamente a conoce su prome ‘problema’ entre e dos partidonan AVP, MEP y presidente di Parlamento. Esaki a bay asina leu cu lider di fraccion di MEP a entrega keho na gobernador contra fraccion di AVP na final. E argumento ta cu lo ta ‘hungando’ cu e budget recht y cu no a duna chens pa haci pregunta. Presidente di parlamento Marisol Lopez Tromp sinembargo a splica NoticiaCla.com cu ta falta di e partido MEP mes cu cos a bay manera cu e la bay, pasobra MEP no tabata presente durante e reunion. “Awor nan ta haci como si fuera ta falta di otro hende” Lopez Tromp a bisa NoticiaCla.com.

Segun lider di fraccion di e partido heel Evelyn Wever, loke cu nan ta protesta ta e hecho cu fraccion di AVP a ‘dicidi otro cu loke a keda palabra pa propio presidente di Parlamento’, y manda e leynan bek pa ministernan cu un ‘blanco verslag’. (Un blanco verslag ta nifica cu no ta manda pregunta por escrito, sino mas bien ta haci pregunta directamente na e ministernan ora cu trata e leynan den un reunion publico).

Den e keho, Wever ta splica kico tur a wordo palabra (entre otro cu entre 13 te 19 di november tin chens pa manda pregunta por escrito) . Y cu basa riba esey, e fraccion tabata ocupa cu nan preparacion di pregunta. “Ta claro cu nos fraccion lo no acepta esaki, y nos lo entrega nos preguntanan segun e tempo stipula. Wever ta bisa di a informa e presidente di parlamento tambe. Segun Wever, ta netamente loke cu Algemene Rekenkamer a alerta e fraccion parlamento, y toch e presidente di parlamento ta permiti esaki. Wever ta teme cu lo bolbe surgi un situacion manera cu a sosode ora cu a trata e presupuesto inicial 2014.

Lopez a confirma na NoticiaCla.com loke cu Wever a bisa, esta di e plan pa manda pregunta aden conforme palabracion. Problema segun Lopez sinembargo ta, cu ningun miembro di MEP a bin comision central diaranson. Segun Lopez ta den sala e parlamentarionan hunto ta dicidi si un ontwerplandsverordening ta haña un voorlopig verslag of blanco verslag. Segun Lopez, “esaki ta banda di e hecho cu durante tur e reunionnan di vaste commissies den e simannan cu a pasa, parlamentarionan cu a participa y tabata presente ne reunionnan preparatorio a hasi pregunta y haña contestanan di instancianan y ministers riba varios ley cu nos tey trata pronto”. “Door cu niun parlamentario di Mep a show up awe, nan ta reageer comosifuera ta falta otro hende, pero ta nan mes ta responsabel pa nan ausencia” Lopez a bisa finalmente.