Serlimar: Retiro abrupto tabata decision personal di vocero mes

ORANJESTAD – Mientras cu e tema principal di e conferencia di prensa di Serlimar Sui Generis no tabata e retiro abrupto di e vocero y alabes gerente di mercadeo di Serlimar Sui Generis, e tema ey a domina e conferencia diahuebs merdia. E director di e compania Henley Davelaar riba e tema a bisa e.o. cu e retiro di e persona en cuestion esta esta Twyma van der Biezen, no tabatin ningun toke politico. Segun Davelaar, e alegacionan cu a bin despues di retiro di e vocero, tabatin un tinte politico pa otro medionan, pa cual e compania ta distancia su mes di dje. Van der Biezen mes no a reacciona riba e asunto despues cu el a tuma su retiro abrupto un dia anterior. 

RETIRO POLITICO

E medio cu a raporta e retiro di e persona, esta 24ora.com segun Davelaar lo a duna esaki un tinte politico, alegando cu pa motibonan politico e mester a bay pa traha lugar pa otro, manera cu lo tabata e caso di trahadonan anterior cu tampoco no tey mas. Entre nan, ta menciona e vocero prome, Nataly Wolff cu no ta trahando den e funccion desde aña pasa mei. Segun Davelaar, e retiro di van der Biezen tabata un decision personal di e persona, y e ta desea e persona ey tur cos bon. Pero cu ningun momento nan ta responsabel pa e retiro. 

DISCUSION CU E DIRECTOR

Otro punto desbarata pa e director, ta cu ta despues di un intercambio fuerte entre e persona en cuestion y e director, cu e persona a dicidi di tuma su retiro abruptamente na fin di dia. Davelaar ta sigura cu esey no ta berdad, y cu e mes a tende despues pa medio di un email, ya cu e mes no tabata na oficina e dia ey. Pues no por ta e ora cu e intercambio tabata entre e y e ex vocero. No a bisa si, si e discussion tabata cu un otro persona. 

BARINAN NO A YEGA?

Ademas, cu e retiro a bin un cantidad di asunto afo, cu tambe a haya atencion durante e conferencia di prensa. Entre nan, cu contrario na informacion cu ta circula, cu e barinan nobo di Serlimar no a yega, y cu tin problema cu e operacion. Aki tambe Davelaar a desmenti e informacion ey, bisando cu berdad ta un cierto cantidad di bari a yega awor, y cu entre awor y November, tur bari nobo lo ta na Aruba y reparti. Segun Davelaar, a planea esaki debidamente pa concuri cu e.o. e periodo di vacacion grandi unda cu tin menos personal, y cu yen di hende cu vacantie. Esaki ta pone cu ‘a palabra’ cu e proveedor di e barinan pa no manda tur pareu sino haci esaki den fase, pa asina poco poco segun cu tin personal, por suministra tur hende cu e barinan aki. Pues no ta berdad segun e director, cu e barinan nobo no tey of cu lo no tin suficiente. E informacion cu tabata circula, ta cu no tin bari den stock y cu esaki ta un problema debi na un situacion financiero no sano na e compania.