Minister desapunta y e fundacion contento cu sentencia Lotto

ORANJESTAD – Mientras cu di un banda, gobierno di Aruba (lesa: minister Dangui Oduber) ta ‘hopi desapunta’ cu e sentencia di corte di diaranson riba e tema di Lotto, na nomber di hunta di supervision, nan ta contento cu e setencia aki, ‘Corte a proteha deporte di metemento politico’. Cada banda a reacciona diaranson riba e tema, creando e impression cu cada uno ta para riba nan punto riba e situacion cu tin. Di parti di gobierno, a indica cu ta bay inicia un lotto ‘nobo’ mientras cu di e otro banda,e fundacion ta pensa cu ‘corte, despues di evalua e caso pa lunanan largo, awe a para banda di e Hunta di Supervision di Fundacion Lotto’.E pregunta ta keda con esaki lo afecta e comunidad y mas importante ainda, financiamento di deporte na Aruba. 

REACCION LOTTO

Segun e fundacion, e Magistrado a tene cuenta cu Minister tin e autoridad pa retira miembronan di Hunta di Supervision pero mester di un motibo valido.”  Djis pasobra ta pensa cu nan tin otro scogencia politico no ta un cuadra cu reglanan di bon gobernacion” e fundacion a bisa. Mas aleu nan ta bisa cu “ mester duna nan oportunidad pa traha y den caso cu nan nenga di traha cu deseonan di Gobierno, loke no por a comproba awo, e ora por yega na un semehante decision’. Ademas, segun Miembronan di Hunta di Supervision di Fundacion Lotto pa Deporte ta bisa di ta ‘masha contento cu e sentencia di Hues y ta considera cu Corte a scoge pa defende deporte y wanta politica leu’. “ Ta un hecho cu politica mester adapta na deporte y no vice versa. No tin necesidad di cambia algo cu ta bon. Ta bisa esaki si considera cu e directiva actual a hereda un Fundacion na rand di bancarota y den e ultimo decada a casi redobla e entradanan di e loteria” e fundacion ta bisa entre otro den un reaccion mas extenso duna. Por lesa e comunicado completo AKI.

REACCION MINISTER

E mandatario despues di a duna un indicacion breve tempran diaranson mainta, cu esaki ta un señal pa cuminsa un lotto nobo, pa anochi, a opta pa bay den mas detayes. “ Hopi desapunta! Increibel pero berdad con un huez ta dicta un sentencia di e manera aki” e mandatario a cuminsa na bisa. Segun e mandatario, ‘loke a sosode aki ta cu un huez ta bin sinta riba stoel di minister’!.” E ta un precedentschepping tambe cu mayan ningun otro gobierno no por retira un miembro di hunta di supervision sin mas!”. E mandatario ta sigui bisa cu den Lotto pa Deporte mal maneho a wordo prueba. E ta mustra entre otro cu e director di e fundacion a wordo kita for di trabou. “E hecho aki caba ta demostra cu no tawata y no tin supervision of control”. “Ademas, miembronan di hunta di directiva ta cambia e statuto pa nombra nan mes pa bida largo despues di eleccion di anja 2017,  acaso Huez no ta haya esaki un decision politico. Nos ta papia aki di amigonan personal di Mike Eman, activistanan di AVP cu a secuestra deporte pa nan beneficio propio. A usa fondonan pa viaha, pa cumpra camera di siguridad, a usa credit card di Lotto y tin un salario cu ningun otro miembro di ningun otro hunta di supervision tin” Oduber a sigui bisa. Lesa e comunicado completo di e minister AKI.