Fundacion Lotto pa Deporte a gana caso contra Gobierno

ORANJESTAD – Fundacion Lotto pa Deporte a gana nan caso contra gobierno di Aruba. Asina huez a dicta den un sentencia di 19 pagina di un caso cu a cuminsa medio aña pasa y cu por lo menos 8 biaha cu a pospone e sentencia. Cu e sentencia aki, Corte ta ‘destrui’ e decision di gobierno (lesa: Minister Dangui Oduber), pa kita 5 miembro di hunta di supervision actual (decision di 3 di januari 2018), y alavez a ‘destrui’ e decision di e gobierno pa nombra 5 miembro di hunta di supervision nobo (decision di 10 di januari 2018). 

METEMENTO

Cu e sentencia aki, corte ta mustra tambe cu esaki ta nifica cu e hunta di supervision actual mester por sigui haci su trabou sin metemento di e mandatario manera cu lo tabata e caso anterior pa cual corte a dicta den pasado caba contra e mandatario en cuestion.

RETIRO

Corte ta di opinion cu e mandatario a retira e hunta di supervision actual sin motibo hustifica. Como tal e mandatario a usa un poder cu e no tabatin, pa cual huez a destrui e decision ey. Lesa e sentencia completo AKI.