Knops ta duna gobierno di Aruba te medio augustus pa reacciona

ORANJESTAD – E carta cu gobierno di Hulanda (lesa:Raymond Knops) a manda pa gobierno di Aruba (lesa: Prome minister Evelyn Wever Croes) siman pasa, ta duna e gabinete Wever-Croes te 16 di augustus 2019 pa ahusta un lista di asunto financiero cu e fin pa regla esaki corectamente pa e fecha ey. Den un reaccion cortico na NoticiaCla.com dialuna, e mandatario ta confirma e fecha y tambe e contenido. 

INQUIETUD CAFT

Notable ta cu e biaha aki, contrario na cartanan di CAFT cu ta dirigi semper pa e minister di Finanza Xiomara Maduro, e carta aki  tabata dirigi na prome minister di Aruba, y no minister di finanza, cu ta splica (atrobe) riba e preocupacion di Hulanda pa cu e situacion financiero cu basicamente ta subraya e inkietudnan cu CAFT a trece dilanti den nan ultimo carta na gobierno.  E prome mandatario a confirma pa e portal aki tambe, cu e ta trahando riba e contesta na Knops. 

E CARTA

Den un reaccion pa e portal aki, Wever ta sigui y ta confirma ademas cu el a ricibi e carta, cu Knops ta ‘expresa su preocupacion pa loke ta e sociaal crisis plan y e gastonan di personal’. “E no ta kere cu nos ta haal e begroting pa personeelskosten y a pidi pa nos ahusta nos planes pa yega na e norm. Esey e kier pa 16 di augustus (2019)”, Wever a sigui bisa NoticiaCla.com. Segun e prome mandatario, Knops ta pidi mas informacion riba e Sociaal Crisis Plan y riba belastinghervorming. “Y e info ey e kier pa 16 (di) augustus (2019)” Wever a sigui bisa. 

RECES

Remarcable ta sinembargo, cu e carta cu Knops a manda a wordo manda net prome cu reces cuminsa y ta spera di Aruba cu den reces, e problemanan menciona, wordo resolvi. Mes moment tin e ley di LAFT cu ainda no a wordo firma y cu mester keda atendi asina cu reces caba. Asina prome minister di Aruba Evelyn Wever Croes mes a bisa e portal aki den un occasion anterior prome cu reces a inicia. Mientras cu no ta conoci kico e respuesta di prome minister Wever ta, ta conoci cu e situacion no ta uno facil, y cu reces of no, tin cu bay haci algo sino por spera problema cu Hulanda. Tur esaki mester ta cla, prome cu e prome reunion di Rijksministerraad (RMR) programa pa dia 30 di augustus proximo. Esaki pasobra pa e ora ey, Hulanda kier tin un bista di kico Aruba ta bay haci cu e ley di Laft y (awor), e carta cu a wordo manda pa prome minister di Aruba.