Contract entre Serlimar y EcoGas ta clarifica ‘asunto di tipping fee’

ORANJESTAD – Mientras cu tin un bay bin entre e compania priva EcoGas y gobierno di Aruba (lesa: Minister Otmar Oduber) riba e asunto di tipping fee (suma pa cobra pa recohe sushi) unda cu e uno ta acusa e otro di informacion eroneo, NoticiaCla.com a pone su man riba e contract cera entre Serlimar (gobierno ta unico accionista) y EcoGas riba 1 di juni 2018, den cual den un articulo specifico, ta stipula cu EcoGas ta obliga pa cobra tur compania cu ta duna servicio di recohe sushi, pa cobra e suma en cuestion, esta di 180 florin. Pues segun e contract di 10 pagina, EcoGas no a ‘malinforma’ pueblo manera cu e mandatario ta bisa. Pa e proposito di e asunto di tipping fee, e portal aki ta publica e articulo # 9 apart pa clarificacion, pero na final tambe e contract completo. 

E CONTRACT

Segun e contract, tin un articulo 9, cu ta specifica na Hulandes, textualmente lo siguiente:” Ecogas verplicht zich om aan alle bedrijven (inclusief Ecotech) die diensten aanbieden voor het ophalen van huishoudelijk- en commercieel afval en die afval bij Ecogas afleveren een tipping fee van Afl 180,- per ton in rekening te brengen’. Pues ta segun un articulo den e contracto firma entre EcoGas y Serlimar, ta stipula e suma ey. 

ARTICULO DI MINISTER

Den un articulo publica tambe riba NoticiaCla.com di e minister en cuestion, e ta reacciona riba e articulo anterior di EcoGas, cu ta bisa textualmente “Minister Oduber a enfatisa cu ningun momento tabatin un negociacion di aumento di tipping fee. Pesey kier ta hopi cla cu esaki y ta lamenta cu e compania por purba malinforma comunidad. Minister Oduber ta enfatisa cu Gobierno no a ricibi ningun fondo adicional den e proceso aki, y no por uza Gobierno como cabay pa gana placa cu ne den un negoshi. Esey ta algo como cliente mester dicidi si ta acepte of no y tambe e comerciente lo mester percura pa e prijs di nan servicio.”. Pero e contract cu NoticiaCla.com tin, y particularmente e articulo menciona, ta mustra otro, y unda cu debidamente tabatin un acuerdo cu ta confirma e aumento di e tipping fee. Wak e contract completo AKI.