Minister a confirma carta di Hulanda pero cu otro contenido

Minister a confirma carta di Hulanda pero cu otro contenido

Posted on 07/21/2019 8:45 pm AST | Updated on 07/21/2019 8:45 pm AST

ORANJESTAD – Gobierno den fin di siman a confirma cu tin un carta cu gobierno a ricibi di Hulanda riba e situacion financiero recientemente. Pero loke e no ta confirma y ta mas bien desmenti, ta e tono y cierto contenido di e carta. Asina e mandatario di finanza Xiomara Maduro a bisa den un comunicado diadomingo. Cu esaki, e kier desmenti informacion di un portal cu a publica cu tin un asina yama ‘brandbrief’ di Hulanda yen di condicion. Sinembargo ni gobierno ni e medio a publica e carta, pa por mira kico realmente e ta bisa. NoticiaCla.com mientrastanto a confirma si cu CAft a manda un otro carta pa Gobierno, cu dentro di 2 siman lo bira publico. No ta sigur si ta e carta aki ta esun cu ta referi na dje. 

CARTA ERONEO

Segun e mandatario, informacion cu ta circula den fin di siman cu un carta a yega di Hulanda den cual ta duna Gobierno di Aruba 1 luna pa aumenta BBO, manda 300 ambtenaar cas y introduci Sugar-Tax no ta cuadra cu realidad. Maduro ta sigura cu locual cu tin riba mesa ta un carta di Secretario di Estado Knops dirigi na Minister President Wever-Croes den cual ta escala e preocupacion di Hulanda pa e situacion financiero di Aruba. Segun Maduro, den e carta ta señala e preocupacionnan treci dilanti pa CAFT den nan ultimo corespondencia cu Minister di Finanzas y ta relata nan na e Protocol firma na november 2018. E Secretario di Estado kier mas claridad riba e reforma fiscal y kier pa inclui e gastonan di personal relata na e Plan pa atende Crisis Social na nos Pais tambe bou di e plafond di gasto di personal acorda den e Protocol. Secretario di Estado a manda pidi Minister President informacion pa asina por atende cu e situacion di Aruba den e proximo reunion di Conseho di Ministernan di Reino fin di augustus proximo. 

LAMENTO

Segun Maduro, esey ta e esencia di e carta y ta di lamenta cu atrobe cierto medionan di comunicacion kier purba bruha tera pa motibo politico. “Na ningun momento e Secretario di Estado a exigi pa hisa BBO, manda hende cas of introduci sugartax” e mandatario a bisa. Con Gobierno di Aruba ta cumpli cu locual a wordo acorda den e Protocol ta prerogativo di Aruba. Segun e mandatario, ta bisto cu lo kier bruha e informacion treci dilanti durante negosacion cu sindicato den cual Minister di Finanzas a informa cu pa crea espacio financiero pa paga indexering di 3,6% lo mester manda mas di 300 empleado publico cas. E mandatario a sigura cu den e dianan siguiente nos dilanti, lo duna mas informacion. No ta conoci si e lo presenta e carta mes cu ta e topico aki. 

  • Powered by SETAR