(ADVERTORIAL)
ORANJESTAD - Recientemente Minister Otmar Oduber a haci algun expresion incorecto, entre otro tocante e acuerdo di tipping fee entre EcoGas y Serlimar. Contrario na su ponencia, ta Minister Oduber mes ta esun cu personalmente a negosha e acuerdo aki. Por medio di un accountant asigna pa e Minister y EcoGas conhuntamente, a yega na e acuerdo mutuo entre EcoGas y Serlimar pa e tipping fee di Afl. 120.00 pa ton pa procesamento/separacion di sushi municipal den envirobales.
E realidad ta cu e procesamento y separacion di desperdicio municipal na EcoGas ta costa mas cu simplemente tira e desperdicio curu riba dump sin procesa esaki, manera tabata wordo haci antes.
No ta corecto cu EcoGas a triplifica e tipping fee manera e Minister ta alega. Es mas, EcoGas a ofrece pa haci e deramento di envirobales pa un suma di Afl. 18 pa ton y ta e mesun Minister a subi’e te na Afl. 60 florin pa ton y tambe a dicidi pa laga un otro compania di transporte haci e trabou ey en bes di uza Serlimar mes pa por haya e entrada extra aki.
Asina e Minister mes a yega na e suma di Afl. 180 pa ton y a stipula esaki den articulo #9 di e contract, obligando EcoGas pa cobra e tarifa aki na tur instancia, incluyendo Ecotech, Serlimar y tur otro cu lo mester hiba nan sushi na EcoGas pa wordo procesa.
EcoGas ta lamenta e alegacion incorecto di e Minister.
EcoGas ta trahando cu e meta di maneha e despredicio na Aruba na un manera duradero y ta cla pa sigui cu esaki hunto cu e Minister y Serlimar.
ORANJESTAD - E asamblea general di Nacionnan Uni a proclama 22 di april como Dia Internacional di Mama Tera. Esaki, nan a haci’e pa medio di un resolucion firma na 2009. E fecha aki ta reconoce e ecosistemanan di e planeta Tera, cu ta e luga di biba di humanidad y cu mester di proteccion pa asina engrandece hende su bienestar, combati cambio di clima y tambe stop e biodiversidad di bay perdi. Aki na Aruba DNM tambe ta reconoce e urgencia pa haci mas y duna un voz na e naturalesa, Mama Tera.
ORANJESTAD – Mas cu mitar di studiantenan local (Aruba) cu a studia usando e prestamo escolar ‘Dienst Uitvoering Onderwijs voor studenten en scholieren’, conoci como DUO, tin problema pa paga esaki bek , ta paga menos cu nan mester paga, of mas pio, no ta paga nada bek mes. E grupo aki ta sigui ta un problema segun representante di DUO, Marit Verbogt manera cu e la splica diahuebs den e programa Noticiacla LIVE. Si tin mas of menos 4000 ex studiante cu tin cu paga bek, y ta algo di mas di mitar tin e problema, por deduci cu e cantidad aki ta mas cu 2 mil studiante local. Verbogt ta splica kico e situacion ta, den e video adhunto. E siman aki e representantenan ta na Aruba te cu otro siman diabierna pa atende cu e grupo aki y tambe studiantenan cu kier un beca via DUO. Nan por acudi na e centro John F Kennedy durante oranan specifico cu ta ubica riba e pagina di FB di nan y tambe e portal di DUO.
ORANJESTAD – E situacion di Dengue na Aruba ta birando mas alarmante. Diahuebs Departamento di Salud Publico a informa cu a cuminsa hospitalisa hende cu ta infecta cu Dengue. Ta trata di 2 persona. Un di e personanan aki ta bek na cas, y e otro ta sigui interna cu complicacionnan serio debi na Dengue. Por a verifica cu ningun di e personanan aki a biaha recientemente, indicando cu ta trata aki di dos caso di Dengue di transmision local. DVG ta informa tambe cu ta observando mas caso cu ta di spera – of cu ta normal – pa e temporada aki.
ORANJESTAD - Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.