- Parlamentario Ryçond Santos Do Nascimento ta invitado den Noticiacla LIVE awe nochi
- Otmar Oduber: Testigo principal pa defensa den caso Flamingo no por declara dilanti Huez Comisario
- Gobierno y CAFT ta den proceso pa reemplaza actual miembro pa Aruba ora su termino vence
- Oduber: Maneho nobo pa haya permiso pa hotel; Ta permiti solamente Boutique hotels!
- AZV: Contracto cu dentista Mayra Rosales ta termina
HOH: Hospital a tuma accion rapido na momento cu a bati alarma
ORANJESTAD – Manera ta conoci, diahuebs atardi rond di 4.45pm a bati alarma na Dr. Horacio e. Oduber Hospital paso a constata candela riba dak di e edificio bieu unda trabounan di construccion y renobacion ta tumando luga. Noticiacla.com a raporta esaki tambe. Diabierna, hospital a sigura cu nan a tuma accion liher tambe. Segun e comunicado, mas trempan diahuebs trahadonan a duna di conoce di ta hayando holonan straño y di biaha e “hulpverlenersteam” di Hospital a bay den accion pa mira di unda e holo por ta biniendo. Manera cu a constata e origen di e holo di huma “ploegleider” di e “hulperverlenersteam di Hospital a paga e candela. Na momento cu Brandweer a yega Hospital nan a tuma over pa asina sigura cu e parti critico a pasa y e candela ta completamente paga.
Hospital tin su mesun di team di calamidad cu ta prepara pa si un calamidad sosode nan bay den accion. Riba pisonan unda pashent ta hospeda tabatin algun molester di huma y pues di biaha a tuma accion pa evacua den forma di prevencion mirando cu e meta principal di e “hulperverlenersteam ta pa salvaguardia e siguridad di pashent. Brandweer a inspecciona e edificionan y manera cu nan a declara nan sin peliger e pashentnan por a bay back nan camber.
Un incidente chikito den forma di candela unda trabounan di construccion y renobacion di Hospital ta tumando luga a ser atendi den forma rapido pa team di Hospital conhuntamente cu Brandweer. Aunke a resolve e incidente aki den forma profesional y rapido pa preveni Hospital a tene warda durante oranan di anochi te cu mainta na e sitio unda e candela a cuminsa pa sigura cu tur cos ta bou di control.
Parlamentario Ryçond Santos Do Nascimento ta invitado den Noticiacla LIVE awe nochi
ORANJESTAD – Parlamentario independiente Ryçond Santos Do Nascimento ta e invitado den e programa Noticiacla LIVE diamars anochi pa 9’or. Recientemente a cumpli un aña cu e parlamentario a distancia su mes di e partido berde AVP y a declara su mes independiente. Un aña despues ta toca temanan general y specifico cu e parlamentario. Un programa sigur interesante y al caso, cu periodista Tito Laclé. No perde!. Esaki riba tur Plataforma di Noticiacla, manera e Facebook page, website y e app.
AZV: Contracto cu dentista Mayra Rosales ta termina
ORANJESTAD - Organo Ehecutivo AZV a informa tur asegurado inscribi cerca dentista Mayra Rosales pa tuma nota cu e contracto entre OE AZV y dentista Mayra Rosales ta finalisa 30 di april 2024. Den caso cu tin un cita despues di 30 di april 2024, lo e asegurado mester tene cuenta cu e cita aki no ta wordo cubri mas door di OE AZV. Ta gradici dentista Rosales pa su añanan di servicio cu el a brinda na e aseguradonan di AZV. Tur clase di exito tambe ta e deseo di OE AZV pa dentista Mayra Rosales cu e continuacion di su practica priva.
Pastoral Hubenil Aruba cu Caminda di Luz Hubenil na misa di Dakota
ORANJESTAD - Tur luna, Pastoral Hubenil Aruba (PHA) ta organisa un evento pa su miembronan y hubentud en general. Pa luna di april, e actividad ta diabierna 26 di april proximo y PHA lo tene un Caminda di Luz Hubenil den misa di Birgen di Fatima na Dakota. Durante e Caminda di Luz of Via Lucis, nos ta recorda e aparicion y momentonan cu a pasa despues di resureccion di Hesus.
Exposicion ‘The trip of my life’ na Bibioteca Nacional di Aruba
ORANJESTAD - Dialuna atardi, dia 15 di april, di 6or pa 8or tabatin apertura di e exposicion di cuadra di Corina Coray, titula ‘The trip of my life’ na Biblioteca Nacional Aruba. A presenta un coleccion di 30 obra di Corina Coray den Sala di Exposicion y esaki ta habri henter siman durante orario regular di biblioteca.
A.T.A. a celebra Earth Day 2024 cu donacion na ‘Ban Lanta y Planta’
ORANJESTAD - Pa conmemora Dia Internacional di Mama Tera 2024, y na un manera diferente, A.T.A. a scoge pa otorga un donacion na organisacion non-profit cu oficialmente a wordo estableci na 2020, esta ‘Ban Lanta y Planta’. Un organisacion cu ta carga e meta pa planta un total di 10.000 mata local pa asina crea, conserva, y restaura un eco-sistema caminda cu flora, fauna, y nos hende local por prospera y co-existi den harmonia.
A.T.A. y Aruba Convention Bureau a contribui na proyecto educacional ‘Edmentum’
ORANJESTAD - A.T.A. y Aruba Convention Bureau (ACB) a forma parti di proyecto Edmentum. Un proyecto cu ta enfoca riba educacion, cu enfasis riba renobacion of construccion di un espacio educativo. Proyecto Edmentum ta diseña pa tin un impacto duradero riba e comunidad local mientras ta ofrece un experencia significante y agradabel pa tur e participante/ voluntario local y internacional.
Follow NoticiaCla
