Corte: Sentencia den caso di Lotto ta otro siman

ORANJESTAD – Despues di lunanan di espera, Corte di apelacion lo dicta sentencia definitivamente diaranson awor 24 di july 2019 den e caso di directive di Lotto pa deporte. Asina vocero di corte a informa diabierna atardi pa medio di un comunicado. Segun e comunicado, e sentencia ta programa pa keda presenta e diaranson mainta pa 9’or di mainta. E sentencia tin cu determina kico ta pasa cu e directiva di Lotto, esta si nan ta keda sinta of si nan mester bandona nan puesto. 

SENTENCIA POSPONI

Tabata luna pasa ainda cu corte pa di 8 biaha a pospone e sentencia, unda cu cada luna practicamente desde aña pasa October, tabata haci esaki. Na juni, corte a informa cu e sentencia lo tabata poni pa September. Pero diripiente esaki a cambia. Como tal, Gobierno mester warda un poco mas pa sa si e por haya control bek den e Fundacion Lotto pa Deporte.

VEREDICTO

Manera a indica caba, ta trata di e veredicto den e caso di apelacion unda cu gobierno kier ‘core’ cu e miembronan di supervision (RvT).  E caso tabata uno unda cu gobierno kier a pidi huez pa core cu e miembronan di hunta di supervision, pasobra nan no ta coopera cu gobierno y no ta permiti gobierno haci cambio. Den e prome caso, huez a dicta contra gobierno, prohibiendo gobierno di mete, y a impone te hasta un multa si gobierno haci esaki toch. Gobierno a apela, y e sentencia mester a keda dicta otro siman.