Gobierno tin te 9 di augustus pa un contra oferta pa indexering

ORANJESTAD – Gobierno (lesa: minister di finanzas) ta haya te 9 di augustus proximo pa bin cu un contra proposicion pa cu pago di indexering pa 2019. Asina e vocero di e grupo di sindicato en cuestion, (sindicatonan manera TOPA, SADA, SIMAR y SEPPA) Eduard Maduro a bisa diahuebs mainta durante un conferencia di prensa. Ta keda awor na gobierno pa wak con a desaroyo aki ta sigui segun Maduro, ya cu contrario na e pensamento di gobierno, sindicato debidamente ‘tin boluntad’ pa resolve e asunto aki. 

PROTOCOL

Segun Maduro, no ta cuestion di cua gobierno, sino cu e gobierno tin cu simplemente cumpli cu e protocol firma na 2014, cu ta bisa cu pa 1 januari 2019, gobierno mester cuminsa paga indexering atrobe. Algo cu no a sosode, pa cual e sindicatonan ta buscando nan derecho. A repasa un 6 reunion cu a tuma lugar entre gobierno y e sindicatonan, pero di cual varios e minister encarga cu finanza no tabata presente, y unda cu finalmente nada concreto no a bin dilanti. Solamente a pidi pa mas tempo y pa ‘skip’ dos reunion planea (3 y 10 di juni 2019) pa duna mas tempo. Pero ora cu a reuni bek dia 17 di juni 2019, no tabatin ‘voorstel’ ainda. 

PRESUPUESTO

Maduro a mustra cu dunando gobierno te cu 9 di augustus di e aña aki, ta mustrando tur boluntad cu tin, y tambe ta duna tempo pa ainda e eventual logro di indexering, keda incorpora den e proximo presupuesto, esta esun di 2020. E presupuesto ey mester ta cla pa fin di augustus, y entrega mas tarda 1 di September na Parlamento. E ora tin cu trate prome cu fin di e aña aki aki. Y mirando e tempo, Maduro ta mustra cu no ta keda mucho tempo pa esaki keda cla. 

OFERTA

Mientras cu Maduro ta papia di punto di salida cu esaki mester ta un pago di indexering di 3.6%, nan ta dispuesto pa otro alternativa. Si papia mes di p.e. 0%, e mester wordo compensa na otro banda, cu p.e. cambio di beneficionan secundario of algo por el estilo. Pero por lo menos mester bin algo. Y aworaki gobierno no a ofrece nada concreto, sino mas bien a pidi mas tempo pa por determina kico nan por haci. Pa sindicato, esey no tabata suficiente pasobra nan no kier gobierno tene nan na liña eternamente. Pa cu e deadline, nan sa cu nan lo tin cu haci algo despues si no logra cu gobierno, aunke no tabata cla pa bisa publicamente kico esey lo ta. E palabra accion por lo menos, publicamente no a cay ainda durante e conferencia di prensa. Den pasado sinembargo, a welga 7 siman largo, prome cu por a logra algo.