CEO Schiphol Group a topa cu gerencia di aeropuerto Reina Beatrix

ORANJESTAD – Management Team di Aruba Airport Authority N.V. (AAA) a ricibi bishita di CEO di Schiphol Group Sr. Jos Nijhuis diabierna ultimo. Durante e bishita di Sr. Nijhuis el a intercambia di idea y pensamento cu e miembronan di Management Team di AAA bou liderazgo di Sr. James Fazio cu ta e CEO actual di Aeropuerto di Aruba. Topico principal di e reunion tabata e ultimo desaroyonan den mundo di aviacion en general, particularmente na Aruba y na Hulanda. Tambe a wordu discuti e desaroyonan cu Aeropuerto di Aruba a pasa aden desde su ultimo bishita na Aruba.

“Aeropuerto di Aruba tin comunicacion y intercambio di informacion continuo cu Schiphol Group a base di e acuerdo cu nos tin cu nan. Pero un reunion personal ta brinda nos e posibilidad pa mustra mas di serca riba e ultimo desaroyonan cu nos ta pasando aden, tanto di e edificionan na aeropuerto pero tambe si nos mira e resultadonan. Tanto Sr. Nijhuis como tambe Management Team di AAA a keda hopi satisfecho cu e reunion. E bon relacion cu Schiphol Group sigur ta na beneficio di nos Aeropuerto cu den e ultimo añanan a resulta hopi positivo si nos mira e cifranan cu cada aña ta keda crece”, asina CEO di AAA James Fazio a bisa na final di e reunion.

Durante su bishita na Aruba Sr. Nijhuis a reuni tambe cu representantenan di Gabinete Eman II, sea Minister Presidente Sr. Mike Eman y Minister di Turismo Sr. Otmar Oduber y tambe a tene un reunion cu e Board of Supervisory Directors di AAA. Cu e reunionnan aki Sr. Nijhuis a reuni cu tur stakeholder envolvi den e acuerdo cu Schiphol Group. E potret ta ilustra Sr. Nijhuis hunto cu Management Team di AAA.