Corte: Arubus no por retira chauffeur di bus pa un post di Facebook

ORANJESTAD – Corte a ordena e compania nacional di transporte Arubus pa tuma e chauffeur Izaak vd L bek na trabou, y sigui paga su salario for di 3 di mei ultimo y si e compania no cumpli, e compania ta haya un multa diario di 250 florin. Cu esaki, e ta duna e chauffeur rason pa a demanda e doño di trabou, ora cu esaki kier a kita e chauffeur pasobra e lo a pone un mensahe fastioso riba Facebook, ‘treciendo e compania den descredito’ y ademas crea un menasa pa esnan riba caminda. Tur esaki corte a bari for di mesa den un sentencia diahuebs mainta. E caso a haya hopi atencion ya cu e tabata algo basta publico, y a wordo hinca den un bachi politico. Y mirando cu ta trata di red social, e noticia aki a plama di tal indole cu el a bira un noticia hopi lesa. 

E CASO

Segun e chauffeur cu a inicia e caso, Arubus ta pretende cu un mensahe cu el a pone riba su pagina priva di Facebook, a causa consternacion, pa cual e compania a suspende y pidi su retiro. E compania ta alega cu e mensahe ta atacha e credibilidad di e compania. Y ademas e mensahe no ta uno apropia. Corte sinembargo ta pensa diferente y ta mustra cu ningun di e argumentonan cu e compania a usa, no ta para. Entre nan, e mensahe no ta haci mencion di Arubus, pues no por link e compania cu e persona den e mensahe. Y e mensahe manera poni, no ta suficiente motibo pa hustifica un retiro inmediato. Tambe, e trayectoria di e chauffeur di 12 aña di servicio sin ningun problema y of incidente, no ta duna indicacion cu esnan riba caminda, mester tin miedo cu e por haci nan algo riba caminda, segun e insinuacion di e compania. Como tal, a dicta e sentencia na fabor di e trahado. Por lesa e sentencia AKI.