Plataforma Ley di Cacho a reuni cu minister riba progreso di trabou pa introduci ley di cacho

ORANJESTAD: - Trabounan di e proyecto di e Plataforma Ley di Cacho ta avansando, cu e intencion pa ehecuta esaki activamente na januari 2015. Den cuadro di esaki dos miembro di e plataforma, veterinario Natalie Booi y entrenador di cacho Tito Lacle respectivamente, a bishita minister di husticia Arthur Dowers diamars merdia. Durante e combersacion aki a actualisa e mandatario riba e plannan di e plataforma, y mas importante, discuti e.o. riba e plannan structural operacional unabes cu e proyecto cuminsa cana. Por pensa entre otro riba, terenonan pa ubicacion di cachonan di caya cu lo wordo confisca temporalmente y e maneho di resocialisacion y re alocacion di esakinan despues si ta posibel. E minister a mustra su aprobacion pa cu e plannan y a confirma su participacion y sosten na e proyecto durante e reunion cu e miembronan di e plataforma.

E plataforma ta consisti di un grupo di profesional na Aruba cu ta atende cu cacho, for di veterinarionan, polis, servicio veterinario, grooming di cacho, entrenadornan, parti legislativo etc. Pa mas di 4 luna nan ta preparando e plan di ehecucion ora cu aña bolter y por implementa esaki integralmente. E plataforma su comision di concientisacion na october ultimo a inicia e campaña di concientisacion, cu ta consisti di informa comunidad pa medio di posters, aviso den medionan di comunicacion, lectura, atende programanan informativo, crea website www.plataformaleydicacho.org y Facebook site plataforma ley di cacho, y un flyer cu ta wordo parti rond di Aruba. Ademas ta dunando demostracionnan tur fin di simannan na lugarnan cardinal, di e uso di un ‘looplijn’, cu ta e alternativa pa esnan cu tin cacho, pero no tin un cura sera pa tene e cacho paden.

Unabes aña bolter, varios team di personanan entrena, lo subi caya y drenta barionan di Aruba. Nan lo e.o. mira situacionnan di cacho riba caya, concientisa doñonan iresponsabel, duna multa si mester, y den caso extremo, confisca cachonan si ta necesario.

Pa garantisa un ehecucion responsabel, e plataforma ta usando tur medio na su disposicion, tanto financiero y logistico y cu sosten importante di gobierno, for di ministernan te na e organo mas halto, parlamento di Aruba. Tur a wordo debidamente informa recientemente y a duna nan sosten completo y desea e plataforma exito. Den simannan cu ta sigui, lo tin mas informacion y presentacion pa esnan interesa.