Huez Mericano a aproba demanda miyonario contra InselAir Aruba

MIAMI – Un huez di districto di Florida (Kathleen M. Williams)  diamars (16 di july 2019) a certifica un demanda pa un caso miyonario (5 miyon dollar) contra e compania bancarota Insel Air Aruba NV. Esaki pasobra e compania durante e periodo cu e tabata opera (buelo entre Miami y Aruba) lo tabata forza pasaheronan pa paga e suma di 80 dollar prome cu nan aborda e buelo na Miami antes. E persona cu a inicia e caso, Hector Saade, tabata indica cu e aeroliña tabata yama e impuesto ey un ‘exit tax’ sin haci mencion di dje riba e contracto (pasashi). El a haya su mes ta paga e suma na 2017 pa su buelo pa Venezuela y Aruba pasobra a bisele cu si e no paga, e no por a aborda. Insel Air Aruba e tempo ey e faya di reacciona riba e keho, y a pidi bancarota na juni di 2017. 

E caso ta parse di no lo ta uno facil mirando cu parti di e problema ta e disponibilidad di e aeroliña pa comparti e datos di pasaheronan manera recibi y pasashi pa haya informacion necesario di e cobransanan. E intencion ta pa cobra esaki bek di e aeroliña, aunke cu e ta bancarota. 

Inicialmente e caso tabata contra e compania madre di Corsou, InselAir International (cu mientrastanto tambe ta bancarota), pero e compania a responde cu e keho no tabata mucho cla ken e ‘acusado’, e tabata y a pidi pa para e caso pa falta di hurisdiccion y fayo pa determina un claim. E ora e persona cu tabata acusa, a opta pa cuminsa e caso contra InselAir Aruba NV. E caso sinembargo, manera indica caba, no tin hopi chens si mira cu ambos compania cu ta wordo menciona, ta bou proteccion di bancarota y no sa si lo por saca algo.