Albertus: Si minister a dialoga cu docentenan, cos lo a cana diferente

ORANJESTAD – E problema cu docentenan na Aruba tin cu minister di enseñansa Rudy Lampe, ta e hecho cu e ta impone y no dialoga y informa corectamente. Asina e presidente di sindicato SIMAR, Josephine Albertus a bisa den e programa NoticiaCla LIVE riba pagina di Facebook di www.noticiacla.com. E ideanan di e mandatario no necesariamente mester ta malo, pero e forma con el a atende cu e asunto no tabata corecto. Segun Albertus, por lo menos e directiva nobo di e sindicato SIMAR di cual e ta forma parti di dje desde November aña pasa, no a haya e chens pa sinta cu e mandatario y discuti con pa implementa e ideanan aki. Y ta e sindicato ta esun yama pa e dialogo ya cu nan ta representa e gremio aki. 

PAGA CANDELA

Mientras cu berdad ta prerogativo di e mandatario pa implementa cambio, e mandatario segun Albertus, mester a acerca e docentenan pa por asina haya un idea di kico ta e preocupacionan pa cu e plan y hunto contempla e miho forma pa introduci e ideanan nobo. Berdad cu tin cu inova, pero e situacion na Aruba no ta duna pa inova simplemente manera cu ta tuma lugar na e.o. Hulanda. Eynan mes, de hecho segun Albertus, tin cosnan cu por tuma lugar cu no mester di haci cambio, debi na e grandura di e pais y e recursonan cu tin disponibel. Aruba siendo un isla chikito, mester adapta su mes y usa e loke e tin, pa por sigui dilanti. 

FUTURO

Pa aworaki, e logro di no implementa e ideanan sin mas, ta pone cu e docentenan ta keda mas trankil pa prepara nan mes pa e siguiente aña escolar. Ta durante e aña escolar, lo kier sinta cu e mandatario en cuestion y wak con structuralmente y cu dialogo, por implementa cierto di e ideanan cu e minister a bin cune, y no impone sin mas sin ‘inspraak’ di e docentenan. Asina Albertus ta wak e situacion. Cu no a sigui cu e plan di minister, no necesariamente ta nifica cu cos lo pega den enseñansa, ya cu e no ta mara na un tempo di ‘sino fono’ y cu si no aplica esaki, Aruba lo cay atras den e ramo aki. 

MIEMBRECIA POBER

E presidente ta admiti cu e cantidad di miembro di sindicato SIMAR no ta representativo di e cantidad di docentenan cu tin na Aruba, pero esey no kier men cu no por representa nan. Tin un total di 1600 docente na Aruba, pero solamente 400 ta miembro di e sindicato. Y ta haciendo todo por todo pa aumenta e cifra di miembrio drasticamente pa asina sikiera tin mas representacion. Asina mes, Albertus a sigura cu ta trahando di un forma hopi transparente, cu un pagina di Facebook habri pa tur hende, docente y no docente, unda cu tur hende tin acceso riba informacion cu e sindicato ta comparti riba e pagina ey. Y nan meta, esta di e sindicato, ta pa bringa pa no solamente e miembronan, pero tambe no miembro. E hecho cu e cantidad di miembro ta abou, no ta nifica cu den e lucha actual, nan lo no logra nada, segun Albertus.