Tur tres sospechoso den caso Kinikini ta apela nan sentencia

ORANJESTAD – Tur tres sospechoso den caso di portofoon, conoci como e caso Kinikini, lo apela nan sentencia ricibi dialuna ultimo. Diaranson mainta abogado di e ultimo sospechoso, Kenneth Rasmijn a confirma pa NoticiaCla.com cu su cliente tambe lo apela su sentencia, mescos cu ta e caso cu e otro dos personanan, Nelson ‘Speed’ Andrade y Marko Espinoza. Di e otro dosnan tabata conoci caba di nan apelacion, y awe mainta a confirma esun di Rasmijn. Andrade y Rasmijn a haya castigo di 240 ora di trabou comunitario y Espinoza 180. Ademas Andrade a haya 2 luna di castigo di prison condicional, cu un periodo di prueba. Ta trata e caso unda cu e polis Rasmijn ta acusa di a malversa e portofoon di polis, y e dos otro personanan den nan rol como periodista, a usa e radio asabiendas cu e no ta di nan y a usa e informacion pa suministra na otronan tambe, cu ta contra ley.