SAC ta ‘hou aan’ caso di diaranson y entama otro caso pa forza un contesta di gobierno

ORANJESTAD – Stichting Arubaanse Carnaval lo pidi huez diaranson mainta pa ‘hou aan’ e voorlopige voorziening den LAR’’. E ta pendiente un otro caso cu nan lo entama dialuna awor pa forza gobierno duna un fecha riba cual lo bisa ken ta haya e permiso pa organisa carnaval. Inicialmente SAC lo mester a bringa gobierno den corte di LAR diaranson mainta riba e hecho cu ‘a duna SMAC’ un permiso. E decision repentino a bin despues cu (manera cu NoticiaCla.com a raporta anteriormente) gobierno su abogado a manda SAC su abogado un declaracion firma pa prome minister Mike Eman, cu ta bisa cu “ relaciona cu e peticion di permiso pa carnaval door di SMAC y SAC, cu no a tuma decision ainda. Nan ta bow di consideracion ainda”. Esaki ta e parti cu abogado di SAC, Darrin Crouch, durante un conferencia di prensa diamars atardi a lesa pa prensa. Crouch, ta considera esaki ‘abuso di poder’ di parti di gobierno. “Nan a tuma hende haci” Crouch a sigui bisa. Di otro banda, e declaracion ta bisa tambe, cu gobierno a duna SMAC un 'toezegging', contal cu e cumpli cu un lista di condicion. 

Como tal, Crouch lo wanta e caso di diaranson mainta ‘pa un periodo cortico’, y pa dialuna lo entrega otro caso contra gobierno. Tecnicamente dialuna awor ta cumpli 12 siman cu pa ley di LAR, mester warda pa por exigi un contesta riba un peticion pa permiso haci. “Nos ta bay pidi pa gobierno wordo mara na un fecha y un dwangsom pa tuma un decision definitief si SAC ta haya su permiso si of no”.

Anteriormente, Crouch a splica NoticiaCla.com cu e loke cu gobierno a haci awo ta un intento di stroba e caso den corte di Lar diaranson mainta awor. Door di bisa cu ‘no tin permiso duna ainda’, e tactica aki lo mester debilita cualkier chens cu SAC por tin den corte diaranson, segun e abogado. Esaki siendo cu algun tempo pasa, durante un conferencia di prensa, gobierno pa medio di prome minister Eman y minister di cultura Oduber, ambos a declara cu nan a dicidi cu Stichting Maneho di Carnaval di Aruba SMAC, ta haya e permiso pa organisa carnaval 2015. Minister encarga cu carnaval, Otmar Oduber a sigura NoticiaCla.com diamars atardi cu lo duna comentario despues di e caso. Mes momento e presidente di SMAC, Randy Thiel no por a duna comentario pasobra e lo ‘no a tende e declaracionnan di SAC y e abogado’. Lesa e carta cu gobierno a manda pa corte diamars aki)