Accion na Guarda Nos Costa ta keda opcion segun sindicato SEPPA

ORANJESTAD – Un posibel accion di un grupo di 40 trahado na departamento di Guarda Nos Costa ta keda un opcion segun lider sindical Edmundo Marlin, despues di a reuni cu minister di husticia Andin Bikker dialuna atardi. Segun Marlin, a entrega un carta di 30 punto di preocupacion cu minister mester atende dentro di un tempo corto. Na NoticiaCla.com mainta, Bikker a confirma e reunion di atardi, pero a bisa tambe solamente cu e lo a scucha e sindicato, sin bay den detayes riba e situacion. 

REACCION MINISTER

Por a compronde di e mandatario den su comentario na NoticiaCla.com, cu e no tabata aprecia e mini referendumnan cada bez di gruponan cu tabata mustra sea nan sosten of nan desaprobacion pa mando di varios departamento incluyendo esun di Guarda Nos Costa. Ora cu a puntra e mandatario riba e maneho di Hassell, el a mustra cu segun e, algun tempo atras un grupo mayoritario a mustra su sosten total na e hefe, y cu tabata contento pa cu su independisacion di e departamento. Awor ta mustra segun Bikker, cu un grupo minoritario, ta contra e hefe y cu nan kier pa e move. Pero e no ta aprecia e tipo di cosnan asina unda cu kier retiro di un hefe. E no ta haya esaki e miho forma y cu e ta bira dificil pa maneha y goberna asina. 

MAYORITARIO

Contrario na declaracion di Bikker, Marlin a bisa dialuna atardi cu e grupo aki cu kier retiro di Hassell, ta uno mayoritario cu ta pensa cu Hassell no mester tey y cu dentro di un tempo cortico, mester cuminsa pensa riba motibo pa retira of cambia Hassell di posicion. E lista di 30 punto ta mustra kico tur ta malo cu Hassell, aunke no kier a specifica kico nan ta. Pero a bisa si cu mientras cu a duna e mandatario un tempo pa e dicidi, cu e mandatario su tempo ta limita. Si tarda den esaki, e mandatario por spera un accion di e trahadornan. Marlin a confirma cu enberdad tin dos grupo di cual esun minoritario ta esun cu ta pro Hassell. Mientras cu no a duna e minister un ultimatum, ta cla cu tempo no ta na fabor di e minister y cu e sindicato no tin pensa di warda eternamente. Potret ta di archivo di NoticiaCla di un conferencia di prensa di minister Bikker cu hefe di GNC Trudy Hassell.