Van Zwol pa Aruba, y Plasterk pa Bonaire y Corsou

DEN HAAG – Mientras cu e siman aki ta cuminsa cu bishita di Hulanda pa Bonaire y Corsou di gobernantenan hulandes, e siman lo caba cu un bishita di representante hulandes pa Aruba. NoticiaCla.com a haya informacion cu diabierna awor e ambtenaar mas halto di gobierno hulandes, Richard van Zwol, lo ta na Aruba pa atende asuntonan financiero entre Aruba y Hulanda. Mientrastanto su hefe director minister Ronald Plasterk a inicia un bishita di trabou na Bonaire dialuna atardi, y ta termina esaki cu un bishita pa Corsou diaranson.

For di fuentenan fededigno, NoticiaCla.com a compronde cu e meta di e bishita di van Zwol ta pa ‘convence gobierno di Aruba, cu mester di ayudo di Hulanda pa por drecha e e situacion financiero. Y cu ayudo, por compronde cu esey ta control y medida auspicia bou di gobierno hulandes, pa sigura cu e situacion financiero mehora. Mes momento NoticiaCla.com a compronde cu na Hulanda mes, no ta mucho cla con tin cu anda cu e asunto di finanza di Aruba, y cu esey ta un di e motibonan cu Aruba ‘no a haya un KB nobo’ manera cu tabata specula. NoticiaCla.com a confirma tambe cu e ultimo simannan (particularmente dos siman pasa, tabatin algun intercambio entre Hulanda y Aruba basta ‘cayente’, riba e tema di finanzas. E combersacionnan aki lo continua ‘personalmente’ ora cu van Zwol yega Aruba e fin di siman aki.

Minister Plasterk mientrastanto no ta bishita Aruba e siman aki, ni tampoco St Maarten. Manera cu NoticiaCla.com a raporta anteriormente caba, tabatin un discusion entre Hulanda y Bonaire siman pasa pa loke ta e itinerario di e mandatario. Dado momento Bestuurskantoor di e isla di flamingo a pone pia bou y bisa cu si no adapta e itinerario, nan no ta dispuesto pa reuni cu e mandatario. E mandatario finalmente a ‘baha cabes’ y a acepta pa cambia esaki pa asina ‘cumpli’ cu e agenda di Bestuurskantoor. E mandatario tabata programa pa yega Aruba si di transito, pero sigui mesora pa Bonaire, sino baha for di avion na Aruba. Durante e bishita cortico na e dos islanan, e lo reuni cu varios instancia particular riba algun tereno specifico, fuera di reuni cu e gobernantenan di e respectivo islanan.