Bapor Maridive a huy di Aruba pa evita beslag miyonario

ORANJESTAD – E bapor (remolcador) Maridive 702 cu ta nabega bou di bandera Panameño, a hui di Aruba dialuna marduga pa evita un beslag miyonario. Fuentenan cerca di e proceso a confirma pa NoticiaCla cu awe mainta e capitan lo a paga e asina yama Automatic Identification System (AIS) pa asina purba bandona Aruba sin keda detecta. Esaki ta un acto castigabel pa cual por detene y encarcela e capitan. NoticiaCla.com a compronde cu e bapor ta net pafor di awa territorial di Aruba y cu ayuda di Warda Costa, ta purbando di haye den awa territorial bek. 

E CASO

E caso manera informacion cu NoticiaCla tin, ta mustra cu dia 9 di july, Corte di prome instancia a otorga permiso na tres identidad di cual un di nan ta Riverlake, estableci na Corsou, pa pone beslag riba e bapor en cuestion. E beslag ta pa cobra e compania doño, Maridive SAE Maridive  un suma di 21 miyon dollar. Maridive ta doño pues di e bapor en cuestion. 

E BESLAG 

A pone beslag diadomingo ultimo, 14 di juli 2019. Esey ta nifica cu e bapor no por a bandona Aruba mas. Pero manera ya informa, esey a sosode toch awe marduga. Ta premira cu esaki por bira un asunto serio legal cu por conduci na entre otro detencion di e capitan y regreso di e bapor pa Aruba.