Oduber: Kier investiga posibel fraude di laboratorio na hospital

ORANJESTAD – Un carta lo ser dirigi na e hunta di supervision di hospital pa laga un partido independiente haci un investigacion forensico inmediatamente, riba posibel fraude tumando lugar den Laboratorio di Hospital. Asina minister di Salud Dangui Oduber a bisa NoticiaCla.com dialuna mainta. Segun Oduber, a tuma nota di e articulo cu a ser publica den columna di Sr Van der Zee den e vespertino Amigoe. E mandatario ta bisa cu el a tuma contact cu e kroonleden di gobierno den e hunta di supervision di hospital. Y mientrastanto e mnandatario ta den contacto cu e otro miembronan tambe. 

ACUSACION SERIO

E acusacion ta trata posibel fraude tumando lugar den Laboratorio. Segun e mandatario ta un acusacionan hopi serio cu ta ser haci y como minister encarga cu salud e ta tuma esaki tambe na serio y ta maneha esaki cu cautela.

CON FRAUDE TA TUMA LUGAR

“E ta un acusacion di fraude y segun e articulo, ta duna informacion tambe con e fraude lo ta tumando lugar. Nos ta papiando di testanan delicado cu ta wordo haci pa salud di hende y cu esaki no tin espacio pa haci fraude y tipo di cosnan cu ta wordo insinua” Oduber a bisa. 

Segun e mandatario, como minister di salud loke a wordo treci dilanti ta algo cu ta nobo den sentido nunca e no a wordo informa di posibel caso di fraude aki na laboratorio di hospital door di ni e hunta di supervision di hospital ni door di e raad van bestuur di hospital.

“ Obviamente si mi tawata na altura lo a tuma e accionan necesario. Den e caso specifico aki un carta lo ser dirigi na e hunta di supervision di hospital pa laga un partido independiente haci un investigacion forensico inmediatamente.”  

KEHO

E mandatario a bisa cu a raiz di e resultado di e investigacion forensico lo determina si mester entrega un keho pa un investigacion penal na ministerio publico pa asina esnan responsabel di e posibel fraude wordo persigui. Ministerio publico lo wordo poni na altura tambe!