Cantidad masal di AO ta motibo cu atrobe a sera edificio di DIMAS/DAO

ORANJESTAD – Cantidad masal di hende cu a meld ‘AO’ diahuebs ta e motibo pa cual e edificio di DIMAS/DAO ta sera atrobe, for di diabierna ultimo. Dialuna mainta directora di Dimas, Kathy Ruiz-Paskel a confirma esaki na NoticiaCla.com, splicando cu un total di riba 20 trahado mester a bay cas diahuebs merdia. Simptoma cu ta varia entre rash, kimamento di wowo, te na presion di cabes a pone cu mester a manda nan cas y sera e edificio. Tur instancia a keda informa di e situacion, y a dicidi cu pa haci un evaluacion y trabou aun mas rigoroso cu esun anterior, e edificio lo por keda sera pa entre 10 pa 14 dia atrobe.

Segun Ruiz, e situacion ta uno fastioso pasobra ta apenas diaranson cu e instancianan concerni manera DOW a duna e ‘green light’ pa por habri e edificio ya cu un siman di inspeccion y trabou, a mustra cu ‘tur cos tabata ok’. A resulta atrobe cu esey no tabata e caso. Diabierna mes a reuni cu e.o. director di DOW, representante di DTI, SVB, Ministerio di infrateam, y a contesta pregunta di personal y tambe sindicato cu tin representacion di e dos departamentonan. Riba e recomendacion eynan di SVB, ta sera e edificio pa haci testnan adicional. ‘Lo bin cu un plan van aanpak nobo, pa wak kico ta e motibo cu ta causa e rash na curpa di trahadonan, na momento cu nan ta den edificio nobo di DIMAS na Paardenbaaistraat” Ruiz a sigui bisa NoticiaCla.com. E ta un situacion segun e directora, cu nan no a desea. “E ta stroba nos operacional formalmente”. Pero no tin otro manera y a bay bek e ora na e respectivo departamentonan cu a duna sosten ultimo dos pa tres siman, den e periodo cu a pasa. Entre nan tin Enseñansa pa empleo, Bureau naturalisatie y DIA. For di dialuna e servicio pues ta bek na e sitionan aki. Awor tin cu mira kico lo sali for di e proximo testnan aki.

A keda palabra cu lo contrata un compania pa haci testnan rigoroso pa descarta kico por ta causando e situacion na e edificio. Tambe lo tuma otro medida unda cu lo saca e isolacion for di e plafon nan pa wak si ta esey ta e causa di e malestar nan menciona. “E ta un situacion fastioso pero nos ta spera cu pronto e por normalisa y cu nos por reanuda nos trabounan y haal in tur e atraso cu a bin acompaña cu esaki”, e directora a sigui bisa. A pidi e clientela pa pasenshi y sigui den prensa kico e cambionan di cita ta.

Di parti di minister di labor Paul Croes, NoticiaCla.com a haya solamente confirmacion cu enberdad e edificio ta sera pa e proximo 10 dianan. Di e minister di infrastructura y responsabel pa Dimas, NoticiaCla.com no a logra haya comentario.