Agente policial Rasmijn sentencia pa caso di portafoon malversa

ORANJESTAD – Agente policial Kenneth Rasmijn a keda sentencia pa huez dialuna mainta na 240 ora di trabou comunitario. Huez a haya proba cu Rasmijn a comete actonan castigabel pa ley, entre nan malversacion di un portofoon di polis. Segun huez, Rasmijn a malusa su poder di polis pa comete e acto aki, creando asina un mancha riba cuerpo di polis y atachando e integridad di e cuerpo. Ademas, Rasmijn tin un function particular di ehempel, y cu su comportacion, a viola e posicion aki. A mustra cu di un agente policial, ta spera integridad, pa cu e cuerpo y e comunidad. Ambos a wordo viola awor. Teniendo en cuenta e circumstancianan di Rasmijn, y e hecho cu cuerpo policial ta pensa di kita e polis for di trabou, huez a sigui e sugerencia di fiscal, y a sentencia e polis na 240 ora di trabou comunitario, y si e no cumpli, e ta sinta 120 dia den prison, kitando e tempo di aresto preventivo.

E CASO

Despues cu Ministerio Publico a presenta e cargonan contra e respectivo sospechoso durante e tratamento di e caso, Huez a confronta e sospechoso  cu su respectivo cargo n. Entre otro a confronta e polis Rasmijn con bin nunca a raporta e radio perdi. Segun e polis, e radio no tabata perdi, pero tabata ora cu e charger di radio di un di su coleganan a perde, a cuminsa busca esey y a bin nota cu di dje tambe tabata perdi. A confronta e sospechosonan cu e hecho cu tin informacion via e GPS (Global Positioning System) di e radio, cu ta ubike na cierto sitionan riba diferente fecha. Hunto cu declaracionan di un di e sospechosonan (e periodista Espinoza), Fiscal ta haya comproba cu e radio tabata den poder di e sospechosonan, y cu e confesion di Espinoza ta confirma e informacion di e GPS pa loke ta localidad di e portafoon y e charger. 

DESMENTI

E polis a desmenti rotundamente cu el a duna un periodista su radio, y cu e informacion di GPS no ta cuadra cu realidad. El a sigura huez cu for di momento cu el a haya e radio (December 2015), cu e tabatin e radio te na momento cu esey a wordo entrega bek na 2018. E ta haya hopi straño cu e GPS ta marca e loke cu OM ta sigura. Loke no a yuda Rasmijn, ta e confesion di Espinoza, cu a confirma cu e radio tabata den su poder, y cu riba orden ‘di mi hefe Speed’, e radio a wordo duna bek na Rasmijn, y cu Rasmijn a ricibi e radio bek. Algo cu e polis a desmenti. Rasmijn tin 2 siman pa apela e sentencia.