ORANJESTAD - Conseho di mucha 2019 di Aruba Hotel and Tourism Association (AHATA) a culmina exitosamente cu un ultimo reunion na Scol Primario Kudawecha Klas 6B. Asina e gremio hotelero y commercial ta bisa diabierna mainta den un comunicado. Segun e comunicado, AHATA a presenta na e Conseho di Mucha con e asociacion lo tuma accion riba e recomendacionnan ricibi.
E dilemma cu e alumnonan a traha riba dje tabata: Con pa motiva personanan local hoben pa traha den sector turistico y sostene e pilar di nos economia. E muchanan a pasa den un proceso di conoce diferente stakeholders di turismo y nan empleado, pa despues duna nan recomendacion pa soluciona e dilema.
CEO di AHATA, Tisa LaSorte, a puntra e muchanan kiko nan a siña durante e proceso cu nan a pasa aden. E hobennan a expresa cu nan no tabata sa e importancia y e impacto di turismo riba nos economia, y cu nan a siña e variedad di trabounan disponibel, e oportunidadnan pa crese den e sector, y cu nan a observa e amor cu empleadonan tin pa e trabou.
Sra. LaSorte tabata hopi impresiona cu e recomendacionnan di e Conseho di Mucha y a sigura e studiantenan cu AHATA lo tuma accion riba tur nan ideanan. ‘A sinti cu alumnonan a haya mas interes den e industria despues di e experiencia aki. Door di amplia nan conocemento di e sector turistico y informa nan di e importancia pa nos economia, alumnonan ta mira oportunidad y valor den turismo’, LaSorte a bisa.
Accion cu lo tuma basa riba e recomendacion di e hobennan ta entre otro: AHATA lo crea un campaña di consientisacion di diferente carera, publica mas informacion riba e beneficionan di traha den industria, compila informacion riba oportunidad di core stage y dia di bishita, y traha hunto cu partners pa introduci turismo den curiculo di scolnan.
Xiomara Berkel, cabesante di Scol Primario Kudawecha a informa cu e ta contento cu un biaha mas AHATA a scoge nan pa participa den e proyecto aki y ta spera di por sigui como nan Conseho di Mucha. “Hopi biaha muchanan ta bin cu ideanan cu hendenan grandi no a pensa riba dje. Nan ta mira e mundo for di un otro bista. Cu ayudo di par di mayor, y nan maestro Rene Kannegieter, nan a completa un proyecto hopi bon’.
Mirla Passchier, Manager di proyecto di Conseho di Mucha, como gradicimento a entrega Tisa LaSorte, CEO di AHATA, un cuadro di potret di e muchanan como recuerdo. ‘E momento di mas bunita ta mira cu companianan a bin bek y duna nan feedback tocante ideanan y conseho. P’e muchanan esey ta algo hopi importante pa nan sinti y mira cu a tuma nan na serio. AHATA no solamente a scucha nan, pero lo haci uzo di nan consehonan’.
AHATA ta gradici Scol Primario Kudawecha, alumnonan y miembronan di AHATA cu a forma parti di e bunita proyecto Conseho di Mucha.
ORANJESTAD – E banda popular di Trinidad Kes the Band ta confirma pa presenta durante e proximo edicion di Flip Flop Festival dia 1 di juni proximo. Durante un conferencia di prensa diahuebs atardi, organisadornan a anuncia esaki, como un di e varios bandanan internacional cu lo ta presente durante e anochi aki. E intencion ta pa dentro di 2 siman presenta demas artistanan internacional tambe. E evento lo tuma lugar riba Bushiri Beach, y lo ta parti den varios seccion. A cuminsa bende carchi caba awe unda cu e prome cantidad di carchi ta bay na 45 florin estilo ‘early bird’ pa tempo limita. Flip Flop Festival ta un producto di cerbez Chill, y Brouwerij Balashi hunto cu Tropical Bottling Company su productonan Coca Cola y Bacardi. Fuera di e artistanan internacional, lo tin artistanan local manera e.o. Tsunami.
ORANJESTAD – Diabierna awor tin estreno di e documentario localmente produci titula ‘I can’t be moe’. Un documentario unda cu e productor ta sigui e bida di e conocido personahe local Alice van Romondt durante 2 aña. Pregunta ta, con a yega na e titulo asina ‘captivo’, un combinacion di Ingles y Hulandes y con esaki a yega pa bira e titulo di e documentario. Tanto e productor Rebecca Roos, como e suheto di e documentario, Alice van Romondt a splica esaki den e programa Noticiacla LIVE diamars anochi. E documentario ta pasa diabierna anochi 19 di april pa 8'or di anochi den Cas di Cultura y ta costa 25 florin pa entrada.
ORANJESTAD – Manera a bira conoci caba, sigur anto pa tur amante di e genero musical aki, luna di april ta celebra mundialmente e aprecio pa jazz. Un di su promotor y exponentenan di mas grandi riba nos isla, esta e maestro di percusion Carlos Bislip a sa di prepara, un biaha mas, un merecido celebracion.
ORANJESTAD - Recientemente Fundacion Aruba One Happy Island Lions Club hunto cu Friends of Lions a organisa e prome “Tayo riba Mesa”, pa aña 2024. Esaki ta un proyecto den cuadro di e programa di Lions International “Hunger Relief”, caminda danki na e sosten di comunidad y Friends of Lions ta yuda famianan den necesidad.
ORANJESTAD - Diaranson anochi na Cas di Cultura, Minister Maduro di den nomber di Gobierno di Aruba, presenta un reconocemento na sr. Ivan Jansen pa su contribucion significante na e herencia cultural musical di Aruba. Segun e mandatario, den e documental presenta riba Jansen, nos ta cera conoci cu e musico Ivan hopi mas di acerca, ya e ta bay comparti su historia di su carera musical, su conocemento, produccionnan, su contribucionnan na diferente musiconan/artistanan local, alabes su logronan local y internacional y e retonan cu ela encontra durante su carera musical E mandatario a repasa e CV impresionante di e musico tambe, indicando cu Ivan no ta solamente un musico, un guitarista clasico y di jazz, sino tambe e ta productor, compositor, areglista, educador, lider di banda y empresario. “Nos ta sinti nos orguyoso di un video documental contando historia di un Arubiano y produci door di nos mes yiunan di tera. Cu e iniciativa di Ivan aki por inspira mas persona cu tin un historia pa conta, pa traha un documental. Asina nos por laga e historia atras pa generacionnan cu ta bini despues di nos” e mandatario a bisa entre otro.
ORANJESTAD – Conocido ciudadano di Aruba Alice van Romondt, ta bira e centro di atencion durante un documentario largo metrahe di e productor di cine Rebecca Roos cu lo ta visible durante e di 10 edicion di Curaçao Internacional Film Festival e siman aki. E documentario, titula “ I can’t be moe; Alice van Romondt (I can’t be tired)” ta keda present ana Corsou entre dianan. 12 y 14 di April. Un siman despues, lo estrena e pelicula akin a Cas di Cultura. Prome cu e estreno na Aruba tin oportunidad unico di wak un exposicion di un seleccion di Alice su collecion priva di arte den e sala di expo di Cas di Cultura for di 6:30 PM.