Ministerio publico evaluando persecusion pa comentario racista di selfie

DEN HAAG – Ministerio publico na Hulanda no a dicidi ainda si nan ta persigui esnan riba FACEBOOK cu a haci declaracionnan riba un selfie di e futbolista hulandes Memphis Depay cu 8 otro hungadornan di color di e oncena hulandes. E selfie a wordo poni riba facebook door di e hungador Leroy Fer. Ministerio Publico ta bay investiga si e declaracionnan haci, ta castigabel y si persecusion ta posibel. No ta conoci con largo e investigacion aki lo dura. Na Aruba ministerio publico a laga sera hende pa declaracionnan haci riba FACEBOOK.

Te ainda, segun ministerio publico na Hulanda, no ta conoci si a haci denuncia contra esnan cu a pone e comentarionan considera como racista riba Facebook. E organisacion oficial di futbol hulandes, KNVB ta considera e reaccionnan riba e selfie, como ‘di mal gusto’. Nan lo atende esaki cu e hungadornan di e oncena hulandes. Segun e organisacion, ‘futbol ta pa tur hende, y net e oncena ta uni hopi hulandes cu otro. KNVB ta pensa tambe cu ministerio publico tin cu actua riba esaki. Tur prueba ta online. Si ta necesario pa nos duna un declaracion, nos lo haci ‘e’ e organisacion a sigui bisa.

Minister di husticia hulandes Opstelten, a yama e comentarionan tambe hopi ‘desagradabel’. E ta asumi cu ministerio publico lo investiga si ta trata aki di sea discriminacion of ofensa. Un di e hungadornan di e oncena, Robin van Persie mes a declara cu e ta hopi tristo cu e comentarionan haci. “Nos ta den 2014. Cu e hendenan aki ta haya un libertad pa pone cierto comentarionan asina? “ e la bisa despues di nan victoria diasabra contra Letland.