Aruba Airlines a suspende buelonan entre islanan ABC

Aruba Airlines a suspende buelonan entre islanan ABC

Posted on 07/12/2019 12:06 am AST | Updated on 07/12/2019 12:34 am AST

ORANJESTAD – Aruba Airlines ta suspende su operacion entre islanan ABC (Aruba, Bonaire y Corsou) te proximo aviso. Asina NoticiaCla.com a compronde di Aruba Airlines diahuebs anochi. E motibo ta e incertidumbre cu ta reina awor cu gobierno no a duna e permiso ainda pa nan efectua buelonan di transito manera previamente anuncia. Esey ta pone e compania den un situacion fastioso cu ta afecta nan gastonan tur dia mas y mas. Y mirando cu ainda no por keda cla cu e areglo nobo, a opta pa te proximo aviso, para e operacion pa asina no incuri mas gasto aun cu tin caba. 

USA AVION

E intencion tabata pa cuminsa bula buelonan transito, pa asina pone e avion Airbus den servicio atrobe, envez di laga esaki para sin uso. Cada dia cu e avion no bula, e ta costa e compania placa. Ademas mester paga e personal tambe conforme contracto, sin cu tin entrada. E intencion pues tabata pa genera buelo pa e avion, y asina haya entrada pa por sigui maneha e compania. Pero despues cu awe, basa riba informacion cu Aruba lo a haya, gobierno di Aruba a dicidi cu ta ‘hala atras’ cu nan intencion di duna permiso. Pero awor ta resulta cu e informacion cu gobierno di Aruba a haya, no tabata esun corecto y cu nan a tuma nan decision a base di informacion incorecto. 

INFORMACION ERONEO

Pues e portal aki a haya informacion for di Venezuela, cu contrario na loke prome minister Evelyn Wever a bisa diahuebs den conferencia di prensa, cu e departamento aeronautica di Venezuela, INAC, a condiciona e permisonan a cambio di buelonan reciprocra, esaki no ta corecto. Documento cu e portal aki tin den su poder, ta mustra cu ningun momento INAC a condiciona e permiso pa e.o. Aruba Airlines, sino a sugeri solamente cu den futuro, ora cu e frontera habri normal, cu e cortesia por bin mescos bek. No cu esaki tabata un condicion aworaki.    No ta conoci pa cuanto tempo e buelonan lo ta suspendi.

  • Powered by SETAR