Despues di exigencia di INAC, Aruba ahala atras pa permiso pa buelo transito

ORANJESTAD – Gobierno di Aruba a hala nan intencion di duna ok pa buelonan transito di Aruba Airlines entre Venezuela y Miami cu un stop na Aruba. Asina e prome mandatario Evelyn Wever a bisa durante un conferencia di prensa diahuebs. E tabata un intento di e aeroliña pa por haya entrada pa un di nan avionan cu ta para pa basta tempo.  Segun Wever, ta ora cu e departamento di aeronautica civil a bin cu e condicion di reciprocidad, cos a cambia. E tabata un peticion cu si Aruba duna ok pa Aruba Airlines, mester dune pa tur aeroliña Venezolano tambe. “Y e ora nos a hala atras” Wever a bisa.

SITUACION

E plan awor ta para, pero segun Wever, esey no kier men cu e aeroliña no ta haya e permiso necesario, sino cu lo dura un poco mas pa nan sali afo. Y e motibo pa cual a dicidi di para, ta pasobra no por tin control riba e aeroliñanan Venezolano. Esun di Aruba, gobierno a impone asina hopi condicion cu nan tabata 200% sigur cu lo no tabata bay tin problema, manera un pasahero dicidi pa pidi asilo politico ora cu nan ta di transito na Aruba, sea for di Merca of Venezuela.