Gobierno ta inicia investigacion riba consumo di droga na Aruba

ORANJESTAD – Gobierno a anuncia diahuebs cu nan ta bay inicia un investigacion riba consumo di droga na Aruba. E ta un investigacion cu lo tin un duracion di 6 luna. Segun e comunicado, hopi ta esnan den nos comunidad cu ta preocupa pa cu e problema di droga na Aruba. Responsabilidad di un gobierno ta pa educa e comunidad por medio di programanan preventivo pa asina evita cu nos hobennan ta cay den adiccion. 

“Bo ta puntra bo mes  con por ta posibel cu un gobierno ta permiti 8 aña pasa sin inverti riba tereno di salud mental.”  Minister di Salud Publico Sr. Dangui Oduber a bisa. “E ultimo investigacion haci ariba consumo di droga y alcohol aki na Aruba tabata 20 aña pasa.” 

Segun e mandatario, hopi cos a cambia durante 20 aña y mirando tambe cu no tawata tin ningun maneho pa 8 aña largo riba tereno di “verslavingszorg” a dicidi di bin cu un investigacion pa asina nos sa unda nos ta para y pa por traha riba miho plannan preventivo.

E investigacion aki ta focus riba e factornan di riesgo bou di hobennan pa desaroyo di adiccion na diferente substancianan. E investigacion aki lo tin un duracion di 6 luna y abase di e resultadonan lo bin cu maneho y intervencionnan mas specifico pa cu nos hobennan pa asina traha na un manera preventivo pa evita cu nos hobennan ta cay den adiccion.