Avioneta cu a haya flat tire tabata Cessna for di Colombia

ORANJESTAD – E avion Cessna cu matricula YV1579 procedente for di Sta Marta, Colombia manera NoticiaCla a raporta anteriormente, a haya un ‘flat tire’ ora cu el a aterisa diahuebs merdia na aeropuerto di Aruba. E avion tabatin 5 persona abordo, pero no a sufri nada serio. Inicialmente a purba yena e tire bek, pero esaki tabata daña di tal forma cu mester a usa un otro alternativa, den forma di un ‘scoop towbar’ pa kita e avion. E pista mientrastanto a habri bek pa 2:12pm, despues di tabata cera un ora. 

TRAFICO

Manera por a spera, e ora tabata uno congestiona cu trafico aereo. Y consecuentemente varios buelo a keda afecta. Entre nan, tabatin DL484 cu a bay Corsou, DL 655 y B61411 cu tambe a desvia pa Corsou. Otronan a keda circula wardando aeropuerto pa baha. Segun director di aeropuerto James Fazio na NoticiaCla.com, aeropeurto ta prepara pa cosnan asina y a atende esaki tambe manera cu nan a entrena pe, y no tabatin daño structural, di manera cu por a habri aeropuerto mesora. Awe nochi den NoticiaCla LIVE, Fazio ta duna mas detayes y tambe mas informacion tocante aeropuerto y su periodo como CEO, den su ultimo entrevista na prensa.