Miss Aruba Digene Zimmerman cu fundraising event ‘Roaring 60’s Martini Night’

Oranjestad – Den cuadro di su preparacion pa su biahe pa representa Aruba na e certamen di Miss Universo 2015, miss Aruba Digene Zimmerman ta organisa un ‘Roaring 60’s Martini Night’ como actividad pa recauda fondo. Y mientras cu Digene ta hincando alma y curpa den e terenonan aki, e mester di nos cooperacion pa realisa otro detayenan tambe hopi importante. E fondonan recauda e anochi aki, lo mester cubri por ehempel, e vestuario amplio cu ta necesario, acesorionan, ekipahe extra pa hiba esaki y e material promocional di Aruba cu e kier distribui durante su participacion na e certamen, etc.

E eleccion di Miss Universe 2014 ta programa pa tuma luga diadomingo 25 di januari 2015 na e US Century Bank Arena di e Florida International University ubica na Doral, Miami na Merca. Naturalmente, e lo yega e ciudad y uni su mes na e agenda pisa di actividadnan pa e candidatanan, for di algun siman prome.

Digene ta un hoben di 20 aña, kende ta traha den sector di moda y ta un modelo profesional tambe. Dia 22 di augustus ultimo el a conkista e corona di Miss Aruba 2014. For di e tempo ey, e ta hopi enfoca den cumpli cu tur e responsabilidadnan di su funcion. E ta apoya y traha cu Fundacion Mi Por, Fundacion Telefon pa Hubentud y Mary Joan Foundation, entre otro.

Pa su recaudacion di fondo, Digene ta presenta un ‘Retro Martini Night’ caminda ta bay celebra e glorioso decada di ‘the roaring 60’s’. E evento ta tuma luga diabierna 28 di november proximo na D Lounge (ex Garufa Cocktail Lounge) ubica na Wilhelminastraat. Entre 8 pa 11, esnan presente lo disfruta di e presentacion di un mescla interesante di musica den man di Bamfstarz, Karixon, Perfecto Sound y tambe e magistral Dhaddy Brokker. Manera por ripara, Digene a percura pa tin algo pa tur hende su smaak. Tambe tin un premio pa e dama y cabayero miho bisti di e anochi den e estilo di 60.

Entradanan pa e anochi fabuloso aki ta obtenibel na Na Trash by Ronchi na Sibeliusstraat, The Stars Hair Styling by Georgie na Dominicanessenstraat y na Mustache Boutique na Paradera. Tambe por tuma contacto cu Robin Croes na 593-8404 y Digenne mes na 7482616 pa e opcion di entrega na domicilio pa grupo y companianan