MEP: Proceso pa reemplaza parlamentario Ras ta despues di reces

ORANJESTAD – E proceso pa determina ken ta bira e reemplazante di parlamentario Sueann Ras, despues cu esaki a anuncia y entrega su retiro dialuna, ta cuminsa despues di receso. Asina presidente di partido MEP Hendrik Tevreden a confirma pa NoticiaCla diaranson. Hopi hende ta afo cu vacacion, cu ta pone cu ta dificil pa dicidi e proceso awor. Tur wowo aworaki, despues di procesa e noticia di retiro sorprendente, ta awor riba ken e siguiente persona ta cu mester bira parlamentario pa e partido. Y pa esaki, tin tres nomber cu ta zona. 

KEN TA SIGUI RAS

Mientrastanto dialuna, Evelyn Wever Croes den calidad di lider di partido, a confirma cu si ta pa secuencia di partido, Luigi Bergen ta e siguiente riba lista, (# 16 riba partido MEP durante ultimo eleccion na 2017 cu 237 voto), pero si partido ta determina cu ta bay segun candidato cu mas voto, e ora ta mustra den direccion di sea Arthur Vallejo (#29 riba lista di MEP durante eleccion 2017 cu 972 voto) of Darlaine Guedez Erasmus (#17 riba lista di MEP durante eleccion na 2017 cu 525 voto). Pero tur esaki ta wordo dicidi despues di reces cu ta e siman di 12 di augustus 2019. E momento ey, ta inicia e proceso di e cambio aki. 

SCENARIO

Tin varios scenario cu por wordo evalua. Entre nan, si partido ta acepta e retiro di Ras, manera cu Wever mes a bisa. E posibilidad di partido ta cu no ta acepta e retiro y cu ta purba convence e parlamentario pa reconsidera su decision. Si esey logra, nada no a pasa y ta simplemente un turbulencia temporal. Pero si e retiro bira uno definitivo, e ora mester busca candidatonan pa reemplaza Ras, y no tin hopi tempo pa haci esey. Esaki pasobra mester tin un candidato cla pa por tuma su posicion prome cu apertura di aña parlamentario e siguiente luna, esta e di dos diamars di September, esta dia 10 di September, practicamente un luna despues. Mirando e tempo cu tin, no ta descarta cu prome cu recess caba lo mester por tin un tipo di solucion.