Oduber: Binimento di Hyatt Ziva pa Aruba no ta confirma

ORANJESTAD – E informacion cu Hard Rock Hotel ta wordo reemplaza cu e cadena hotelero all-inclusive di Hyatt, esta Hyatt Ziva no ta confirma. Esaki minister encarga cu turismo di Aruba, Otmar Oduber a declara na NoticiaCla.com dialuna mainta. E mandatario no por a duna mas informacion pero a sigura cu despues di su biahe pa Hulanda (e mandatario a biaha diadomingo pa Hulanda), e lo duna mas informacion riba e situacion di tanto e grupo Southwest Development Corporation y e status di e proyecto. Fin di luna e ultimatum ‘final’ pa e grupo aki ta vence pa evita cu gobierno por pone man riba e ‘garantia’ di 2 miyon florin.

For di den fin di siman, noticia a cuminsa circula na Aruba cu e desaroyadornan di e proyecto Hard Rock Hotel, lo a laga e cadena aki ‘cay’ y a opta pa cuminsa negosha cu e grupo di Hyatt Ziva pa bin na e sitio cu tin cu reemplaza e actual ruina di Bushiri hotel. Loke a hala mas atencion ta cu e cadena di Hyatt Ziva, ta conoci pa ta uno di all inclusive, cu ta loke cu gobierno di Aruba no ta promoviendo mas, cu excepcion di San Nicolas. Rapidamente por a mira reaccionnan riba rednan social cu ta cuestiona e hecho cu atrobe ta bin cu un hotel all inclusive.

NoticiaCla.com a tuma contacto cu e desaroyadornan pero no tabata exitoso. Den caso di gobierno, tabata dialuna mainta cu e mandatario a reacciona cu e informacion ya duna. E proyecto cu tin cu reemplaza Bushiri hotel, ta uno largo y por haya su culminacion fin di e luna aki. Ta conoci cu na augustus, e mandatario a splica NoticiaCla.com cu si den e caso cu no keda cla cu Southwest Development company despues di e ultimatum, cu conforme promesa haci na parlamento di Aruba, lo debolbe e tereno na comunidad den forma di un beach publico. No ta conoci si dado caso Hard Rock Hotel no logra, cu nan ta keda cu e derecho pa busca un otro cadena hotelero.

Ta conoci cu e cadena hotelero Hard Rock ta sumamente exitoso den Caribe, particularmente na Republica Dominicana unda cu nan ta opera varios di nan y ta genera clientenan di nivel hopi halto. Algun ex trahado cu a labora y conoce e hotelnan aki, a splica noticiacla.com cu turistanan ta gusta gasta na e hotelnan aki y ta turistanan di nivel hopi halto.