FTA: Gobierno a sigura cu fin di October ta regla bevordering pa trahadonan SGVA

ORANJESTAD – Trahadonan di SVGA (Stichting voor Verstandelijk Gehandicapten Aruba) lo mester haya nan ‘bevordering’ mas trada  fin di October 2019. Asina gobierno (lesa: minister Glenbert Croes) y sindicato FTA a acorda diamars mainta durante un reunion, segun Rudy Geerman di FTA a declara despues di e reunion. Ta trata di dos grupo di trahado, esta uno cu a caba nan estudio despues cu nan a cuminsa traha cu SVGA, cu mester haya nan bevordering, y tin un grupo di trahado cu a drenta e fundacion cu e diploma na man. Ambos grupo mester haya e recompense necesario, cu a keda pega desde 2017 ora cu gobierno anterior a cambia e areglo di subsidio. Ta trata di un suma di placa di 500 mil florin pa mas of menos 30 y pico trahado. Awe mainta prome cu e reunion, manera cu noticiacla a raporta caba, e trahadonan a protesta dilanti Bestuurskantoor, cu a conduci na un reunion ci e minister encarga cu asuntonan social, Glenbert Croes.