Banco Central: E consumidor di Aruba no tin confiansa den situacion financiero di gobierno

ORANJESTAD – Confiansa di consumidornan di Aruba ta negativo riba e situacion financiero di gobierno di Aruba. Consumidornan tambe, segun un relato di Banco Central di Aruba a raporta un desaroyo negativo pa cu e mercado laboral actual y di futuro, apesar di creacion di e cuponan nobo di trabou relaciona cu e apertura di e Riu Palace Antillas na October 2014 y e anuncio di e construccion di e Bahia Principe hotel na comienso di 2015.

 E Indice di Confiansa di Consumidor a cay pa di cuatro trimester consecutivo, yegando su nivel mas abou e trimester aki (mira Grafiek 1) . E caida den e sentimento di consumidor probablemente ta relaciona cu retonan riba e tereno economico, finansa publico, y politico cu Aruba a bin ta pasando aden ultimamente. Na final di e di tres trimester di 2014 e indice a alcansa 93,8, un caida di 3,2 porciento compara cu di dos trimester di 2014 (Tabel 1). Poniendo e resultado aki den contexto, un indice di 90,0 ta e nivel di percepcion mas negativo cu consumidornan por tin, segun e encuesta. Un total di 29 porciento di respondiente a indica un deterioracion di nan situacion financiero personal compara cu seis luna anterior, un subida di 3,7 punto di porcentahe compara cu e trimester previo. E mayoria di e grupo aki ta consumidornan cu un entrada bou di Afl. 1.700 pa luna. Adicionalmente, 28,8 porciento di respondientenan ta anticipando un empeoracion den nan posicion financiero personal pa e proximo seis lunanan, cual ta 10 punto di porcentahe mas cu e ultimo trimester. Esaki por indica mas deterioracion den confiansa di consumidor pa e proximo periodonan. Ora cu consumidornan a wordo puntra si nan entrada mensual ta yega pa cumpra mesun hopi cu seis luna pasa, 83 porciento a responde cu un “no”, cual ta igual cu un crecemento di 4,7 punto di porcentahe compara cu e ultimo trimester. Consumo tambe a baha e trimester aki, ya cu casi 60 porciento di respondientenan a indica cu no ta apropia pa cumpra un auto, y mas cu 40 porciento a raporta cu no ta probable cu nan lo bai cumpra aparatonan grandi of bai cu vacacion. Tambe, mas cu 70 porciento di respondiente (esta 20,7 punto di porcentahe mas cu di dos trimester) a bisa cu no ta apropia pa sera un prestamo of un hipoteca.

 Solamente 4,3 porciento di consumidor ta kere cu condicionnan economico ta mihor cu 6 luna pasa (e resultado mas abou registra te cu awor). E resultado aki ta notable, tumando na cuenta e desaroyo positivo den e cantidad di turista, cu un crecemento di 8,2 porciento pa e aña incluyendo September.

Consumidornan a responde particularmente negativo riba e posicion financiero di Gobierno, dunando esaki e respuesta mas negativo di e encuesta te cu awo. Un 66,5 porciento a bisa cu e posicion financiero di gobierno a empeora compara cu seis luna pasa (un subida di 20,7 punto di porcentahe compara cu e trimester pasa), mientras cu 57,0 porciento ta spera un deterioro den e futuro cercano (un subida di 21,2 punto di porcentahe compara cu e trimester anterior). E resultadonan aki por a wordo influencia pa e incertidumbre pa cu aprobacion di e presupuesto di gobierno di Aruba di 2014 y e reciente raport di Comision Financiero di Supervision . Por obtene e presentacion completo di e resultadonan di e encuesta for di e website di BCA. Personanan cu lo desea di haña mas informacion por tuma contacto cu Sr. Jonathan Upegui, Economista di e Departamento di Investigacion na tel. 5252215 of email j.upegui@cbaruba.org.