Premier Wever: Frontera cu Venezuela ta keda cera!

Premier Wever: Frontera cu Venezuela ta keda cera!

Posted on 07/8/2019 2:26 pm AST | Updated on 07/8/2019 2:26 pm AST

ORANJESTAD - Den ultimo dianan a core hopi rumor cu si Aruba lo habri frontera cu Venezuela.  Premier Evelyn Wever-Croes durante e conferencia di prensa di dialuna mainta a anuncia cu esey no ta corecto. Aruba no ta habri frontera cu Venezuela.

FRONTERA CERA

Manera ya conoci, na februari ultimo Venezuela a cera frontera cu Aruba, Boneiro y Corsou, y dia 10 di mei ultimo Venezuela a anuncia cu lo habri e frontera cu Aruba so.  Na e momento ey Gobierno di Aruba a cera e frontera cu Venezuela, mirando e fluho migratorio creciente, y mirando cu no a habri frontera cu Corsou y Boneiro. Premier Wever-Croes a elabora riba e siguiente puntonan:

ESTA 

Gobierno di Aruba ta consciente cu no por tene e frontera cera pa semper, y p'esey ta haciendo preparativonan pa si yega asina leu un dia Aruba por introduci e ESTA di Aruba, den cual un persona cu kier bin Aruba for di Venezuela, mester aplica pa un ESTA online, similar na e ESTA cu nos ta aplica pa bay Merca. Di e forma aki por controla miho ken y cuanto hende ta drenta Aruba for di Venezuela. E ley ta wordo prepara awo y tambe e sistema automatisa pa por maneha e ESTA. Gobierno ta spera cu e proceso di preparacion por keda cla den e siguiente dos lunanan. Tanten e ESTA no ta ‘in place’ Aruba lo no habri frontera cu Venezuela. 

ARUBA AIRLINES

Gobierno a ricibi un peticion di Aruba Airlines pa por haci cierto biahenan di transito di Venezuela pa Merca via Aruba, como un excepcion riba e ciere di frontera.  Aruba Airlines a trece padilanti cu e compania lo no por sobrebibi sin e buelonan di transito y como consecuencia tur e mama y tatanan di famia cu ta traha eynan, lo perde trabou. Gobierno ta hopi preocupa cu e situacion aki, y ta buscando forma pa evita cu Aruba Airlines mester cera. Un peticion similar a wordo haci tambe pa e compania cu ta opera e airport chikito pa avioneta priva. 

TRATANDO PROPOSICION

“Gobierno ta tratando tur dos peticion, pero lo NO habri frontera. No ta asina facil pa djis duna un excepcion, y p'esey Gobierno ta tratando e tema aki cu e prioridad y cautela necesario. Na e momento aki e impacto serio di e crisis di Venezuela riba Aruba ta exigi cu Gobierno di Aruba ta hopi cauteloso cu habrimento di frontera. No ta cu nos no kier yuda, pero ta cu nos bo por yuda. Aruba a y ta haciendo di su parti y awor no por haci mucho mas. Ta momento pa nos pone Aruba prome”, Premier Evelyn Wever-Croes a enfatisa. 

.

  • Destaho publico pa e waste to energy plant no a produci interes

    Destaho publico pa e waste to energy plant no a produci interes

    ORANJESTAD – E destaho publico pa un waste to energy plant no a produci interes. Asina minister di medio ambiente Otmar Oduber a confirma pa NoticiaCla.com diahuebs atardi. Tabata awe 

  • Minister Oduber: Groundbreaking proyecto Baby Beach ta na augustus

    Minister Oduber: Groundbreaking proyecto Baby Beach ta na augustus

    ORANJESTAD – Groundbreaking di e proyecto Baby Beach ta na augustus. Asina minister di turismo Dangui Oduber a bisa diaranson den un comunicado.  Segun e mandatario, na aña 2018 a introduci un masterplan pa San Nicolas na pueblo di Aruba. Un plan cu a enfoca na desaroya e turismo di San Nicolas drechando e aspecto infrastructural, pero tambe activando y modernisa e oficina di turismo na San Nicolas. E vision tras di esaki ta pa incentiva turistanan bai San Nicolas. Na e momentonan aki e destaho publico ta tumando lugar pa despues bai over na gunning y asina e proyecto por cuminsa. Si tur cos cana segun planning den luna di augustus lo tin groundbreaking di e proyecto di Baby Beach segun e mandatario.

  • Croes: Desempleo na Aruba a baha na 2018 te na 7.3%

    Croes: Desempleo na Aruba a baha na 2018 te na 7.3%

    ORANJESTAD – E desempleo na Aruba na 2018 a conoce un reduccion di 1.6%, unda cu na 2018 e tabata 7.3% compara cu 8.9% na 2017. E ta resultado di un investigacion di tres departamento, esta DAO (departamento di investigacion di Labor), CBS (Centraal Bureau voor de statistiek) y Banco Central (CBA). Asina minister di Labor Glenbert Croes a anuncia diamars durante conferencia di prensa. Segun e mandatario, nos no tey ainda, pero e ta un bon señal. E ta  atribui esaki tambe grandemente na e politica nobo ‘anti ontheffing’ cu ta sigura cu mas hende local por haya trabou. Den parti di hoben, tambe a conoce un caida den desempleo, unda cu na 2017 esaki tabata 19.4% y a bira 16.2% na 2018. Na 2011 esaki tabata 23.6%. Aki tambe e mandatario a bisa cu esaki no ta unda cu nos mester ta, pero sigur un mehoransa. Mes momento a mustra cu e cantidad di desempleo ta 4068 cu ta un caida di 20.5% for di november di 2017. Tin un total di 55.845 persona emplea cu ta un aumento di 2.6% compara cu 2017. Wak e rapport completo AKI. 

  • Premier Wever critico riba Hulanda pa aanwijzing duna na Corsou

    Premier Wever critico riba Hulanda pa aanwijzing duna na Corsou

    ORANJESTAD/ CURACAO – Prome minister di Aruba Evelyn Wever Croes tabata critico riba Hulanda relaciona cu e instruccion, osea aanwijzing cu Corsou a haya di Hulanda. Hulanda a duna e isla un aanwijzing despues cu segun Hulanda, e isla no a logra drecha su situacion financiero den tres aña di tempo. Hunto cu e aanwijzing a cera un asina yama 'groeiakkoord' cu medidanan basta stringente cu e isla tin cu tene su mes na dje. Wever a comparti su disgusto riba Facebook den fin di siman. “Curacao a haya un aanwijzing. Mi no sa ki dia Den Haag ta realisa cu e forma di traha aki, no ta soluciona nada” Wever a bisa.  Dialuna durante un conferencia di prensa, el a ripiti esaki. Mientrastanto el a manda un mensahe pa e gobierno di Corsou como muestra di solidaridad. “Na gobierno y pueblo di Curacao, no laga esaki desencurasha boso. Sigi firme padilanti. Nos islanan ta enfrentando retonan grandisimo y descomunal. No ta tur hende ta compronde esey. Pero cu fe y positivismo, nos lo enfrenta tur reto y nos lo surpasa nan!” Wever a finalisa bisando. 

  • Oduber: Kier investiga posibel fraude di laboratorio na hospital

    Oduber: Kier investiga posibel fraude di laboratorio na hospital

    ORANJESTAD – Un carta lo ser dirigi na e hunta di supervision di hospital pa laga un partido independiente haci un investigacion forensico inmediatamente, riba posibel fraude tumando lugar den Laboratorio di Hospital. Asina minister di Salud Dangui Oduber a bisa NoticiaCla.com dialuna mainta. Segun Oduber, a tuma nota di e articulo cu a ser publica den columna di Sr Van der Zee den e vespertino Amigoe. E mandatario ta bisa cu el a tuma contact cu e kroonleden di gobierno den e hunta di supervision di hospital. Y mientrastanto e mnandatario ta den contacto cu e otro miembronan tambe. 

  • Despues di exigencia di INAC, Aruba ahala atras pa permiso pa buelo transito

    Despues di exigencia di INAC, Aruba ahala atras pa permiso pa buelo transito

    ORANJESTAD – Gobierno di Aruba a hala nan intencion di duna ok pa buelonan transito di Aruba Airlines entre Venezuela y Miami cu un stop na Aruba. Asina e prome mandatario Evelyn Wever a bisa durante un conferencia di prensa diahuebs. E tabata un intento di e aeroliña pa por haya entrada pa un di nan avionan cu ta para pa basta tempo.  Segun Wever, ta ora cu e departamento di aeronautica civil a bin cu e condicion di reciprocidad, cos a cambia. E tabata un peticion cu si Aruba duna ok pa Aruba Airlines, mester dune pa tur aeroliña Venezolano tambe. “Y e ora nos a hala atras” Wever a bisa.

  • aruba airlines
  • wcc
  • Powered by SETAR