Parlamentario Ras (MEP) a anuncia su retiro

ORANJESTAD – Dialuna mainta tempran, Parlamentario Sue Ann Ras (MEP) a anuncia publicamente cu e ta retira como parlamentario. Den e video di algo menos cu 5 minuut cu a keda presenta awe mainta trempan riba e pagina di Facebook di partido MEP, Ras a splica cu despues di e incidente cu a sosode cu ne na Hulanda, (e hecho cu un periodista Hulandes a gare ta mira Netflix riba su ipad, y a traha un relato riba esey),  el a dicidi cu e miho decision ta, pa e retira como parlamentario di partido MEP y entrega su asiento bek na e partido. Mes momento segun Ras, e ta spera cu e decision di dje di retira, “por sirbi como un ‘wake up call” pa tur hende y tambe sirbi como un norma di con un persona den e funcion aki tin cu actua den futuro, ora cu e comete un fayo”. Ademas, Ras a mustra cu e sa cu e no a comete nada ilegal ni tampoco horta y como tal, e lo mester a por hala esaki un banda y sigui padilanti. “Sinembargo, ami lo no ta comodo cu esey” Rasn a sigui bisa.  El a pidi despensa na su famia, siguidornan y partido pa loke el a pone nan pasa aden. 

VIGILA DESDE PAFO

Segun Ras, e hecho cu e ta bandona politica activo, no kier men cu e ta bay stop di participa. “Mi por ta retirando di politica, pero mi lo sigui vigila, y aporta cu mi granito di arena consea, sigur pa mehoracion di enseñansa y veld social”. Na final, Ras a pidi pa respeta su decision, su privacidad y compronde cu ‘mi lo kier lag’e te aki, y cera e capitulo aki’. Tur otro pregunta riba e tema, a keda pa partido contesta.  

CONSECUENCIA

E consecuencia di e retiro di Ras, ta pone cu e partido awor tin cu evalua su retiro, wak si nan ta acepta esaki, y sigui padilanti. Un di e posibilidadnan ta cu ta pidi Ras pa reconsidera, of ta acepta e retiro y ta cuminsa e proceso di prepara e proximo riba lista cu lo tin cu tuma e posicion vacante di Ras. Segun secuencia, e siguiente persona pa drenta Parlamento, ta Luigi Bergen, si e acepta. Mester bisa cu entre otronan cu por sigui, tin algun di nan cu ta ocupa funcionan diferente den gobierno y a opta pa no drenta Parlamento, concientemente. Pues ta bira interesante kico lo pasa aworaki den seno di partido. 

NOVUM

Por considera, manera e parlamentario Ras mes a indica, e acto di retiro aki como un ‘novum’ na Aruba, mirando e hecho pa cual e ta opta pa haci esaki. Den pasado, tabatin politico (sea Parlamentario of Minister) cu a haci pio cu esaki, y a opta pa keda sinta riba e stul y no a retira. E por wordo considera como un ‘standard nobo’ den politica na Aruba ora cu un persona, debi na actonan cu por wordo cataloga como ‘no corecto’, y cu no necesariamente mester ta algo illegal of criminal, ta opta pa tene honor na su mes y ta demonstra asina con un persona ta actua pa loke ta integridad di tanto e persona como e funccion. Claro cu semper no por ‘complace’ tur hende, y lo tin cu ta pensa cu, cu e acto aki, lo ‘minimo’ cu e persona en cuestion por haci, ta retira. Tempo lo mustra con e acto aki lo afecta futuro di politica di Aruba. 

REACCION

Prome minister Evelyn Wever a reacciona brevemente riba su pagina di Facebook awe mainta. "Mi ta lamenta e decision di SueAnn pa retira di politica pasobra SueAnn a eherse su funcion como Parlamentario cu hopi dedicacion especialmente pa e terenonan di enseñansa, social y idioma di papiamento. Sinembargo su decision ta esun corecto den e situacion aki. SueAnn a comete un eror, el’a admiti su eror y ta carga responsabilidad pa esaki. Cu esaki SueAnn a demostra integridad, un integridad cu nos no a mira den politica hopi tempo. Mi ta admira cu SueAnn a tuma e decision ak" e prome mandatario a finalisa bisando. Wak e video di su presentacion AKI.