Decision a cay pa toch no habri edificio di DIMAS/DAO pa servicio ainda

ORANJESTAD – Decision tuma diabierna atardi, ta cu e edificio di DIMAS no ta habri mas pa publico dialuna awor, manera a keda anuncia anteriormente. Motibonan di esaki no por a keda confirma, pero NoticiaCla.com a compronde cu e edificio ainda no ta cla y cu atrobe tin problema den e edificio, hasta despues cu a haci control inicial. Como tal, lo a dicidi pa no habri por lo pronto, pero sigui mas bien cu ta sigui cu asistencia na Enseñansa pa Empleo dialuna 17 di november 2014 pa clientenan di DIMAS.

Den un comunicado manda diabierna atardi, DIMAS a informa oficialmente cu nan ta lamenta di informa cu dialuna 17 di november 2014, pa motibonan imprevisto, DIMAS lo sigui duna servicio for di localidad temporario na edificio di Enseñansa pa Empleo. Clientenan cu tawata tin cita diahuebs dia 13 y diabierna dia 14 di november 2014, ta ser informa cu nan cita a wordo hala pa dialuna dia 17 di november 2014 na oficina di Enseñansa pa Empleo.

“Por lo pronto DIMAS lo sigui asisti tur cita na Enseñansa pa Empleo. Asina cu DIMAS tin informacion concreto pa su clientenan respecto e re alocacion na su edificio na Paardenbaaistraat, lo anuncia esaki” e comunicado ta sigui bisa. DIMAS ta pidi tur cliente pa tene bon cuenta cu e cambio ariba menciona y ta pidi ademas disculpa pa cualkier inconvenencia cu esaki lo por trece cune.

Tabata apenas dos dia pasa cu e edificio di DIMAS/DAO a wordo declara sigur, pa tanto e structura y seguridad, como e parti di salud. Despues di un periodo cu e edificio di DIMAS y DAO a keda sera, y tur instancia a haci nan trabou y testnan, nan a haya un carta di DOW acompaña pa rapportnan di e instancia, cu ta declara cu e edificio ta apto pa uso. “ Esey ta haci cu entrante diahuebs por reanuda trabou na DIMAS. Pero pa loke ta servicio na comunidad, esaki lo cuminsa bek dialuna” e directora di DIMAS, Kathy Ruiz Paskel a sigura NoticiaCla.com diaranson atardi. Lo a duna informacion despues ki ora esnan cu tin cita, por acudi bek pa esaki. Ta spera cu tur e medidanan cu a wordo tuma ta pa un soluc “Conform cu Advies di DOW director Marlon Croes, cu consehonan adicional di SVB y Pure Total IAQ Solutions, DTI/WEB ta considera cu e edificio ta sano pa personal por traha den e edificio” minister Paul Croes a bisa NoticiaCla.com diaranson atardi.

Tabata siman pasa cu minister di DAO a confirma na NoticiaCla.com cu e edificio di DAO/DIMAS tabata planea pa wordo "geleverd" door di e compania Total Pure dia 12 di November . Minister encarga cu labor, Paul Croes a confirma esaki na NoticiaCla.com diamars mainta siman pasa. “Despues di un limpiesa grondig y tambe algun ahuste nan ( cu un onder aannemer) na tuberia kibra (kizas sabotea) e lugar lo keda bon” e mandatario a sigui bisa. “ Despues di esaki nos ta spera cu servicionan di ambos departamento normalisa” Croes a finalisa bisando.

Manera ta conoci, pa varios siman e edificio a wordo ‘sera’ pa trabou por a tuma lugar atrobe den e edificio pa wak kico e problema tabata, y mesora soluciona esaki. Mientrastanto e trahadonan di tanto DIMAS como DAO a keda traslada pa otro edificionan pa nan por a continua cu nan trabou diario sin cu esaki ta wordo interumpi. Tur e tempo aki, a reparti e trabou den varios edificio existente y a manda un notificacion pa tur esnan envolvi y pendiente di informacion necesario, pa e trabou no mester a pega. Segun e mandatario, ta spera cu awor cu trabounan ‘extra’ a tuma lugar, cu esaki lo mester alivia e problema pa semper, y no cu despues di algun tempo atrobe, mester bolbe sera e edificio manera a sosode den pasado recien.