Detencion prolonga di pareha pidi pa extradicion pa Merca

ORANJESTAD – E detencion di e dos personanan cu a keda deteni diaranson ultimo riba peticion di Merca a keda prolonga cu 60 dia diabierna. Ta trata di e homber EMC y e muher RMM, ambos biba na Aruba pero naci den exterior. Vocero di ministerio publico Ann Angela a confirma na NoticiaCla.com diabierna cu ainda no ta conoci si e dos personanan aki lo bringa na extradicion of no. Loke si ta confirma ta cu nan lo permanece na KIA te ora cu e proceso termina pa determina si nan ta wordo extradita.

Manera ta conoci, ambos persona a keda deteni diaranson ultimo riba peticion di Merca, pa un caso relaciona cu traficacion di droga. Despues di e detencion, a haci un huiszoeking y a bin encontra droga, cu mas probable ta cocaina segun Angela. Manera ta conoci tambe, e homber esta EMC, a sinta un castigo caba na Merca, tambe relaciona cu traficacion di droga. Mientras cu ta speculando riba caya cu lo ta trata di un familiar di un minister di Aruba, ta unicamente conoci cu e casa di e homber, ta un simpatisante di e partido na mando.

E proceso actual ta uno cu lo tuma su tempo, cu ta 60 dia den cual Merca (e pais cu a pidi pa e detencion cu motibo pa extradicion) tin cu percura pa presenta documentacion concreto pa convence Hof, cu e ta merece un extradicion. Despues cu e periodo vence den cual Merca tin cu presenta su pruebanan, Hof ta stipula un fecha pa trata e caso, cual resultado ta bay pa gobernador, cu na final tin cu dicidi si e ta sigui e conseho di Hof, of no. Tur e periodo aki, e personanan ta keda deteni na KIA.