Asesino di Camilo Sosa a haya 11 aña di castigo di prison awe

ORANJESTAD – Corte a sentencia e sospechoso R. Paskel na 11 aña di prison awe pa caso di homicidio di Camilo Carreño Sosa, cu ta un aña menos cu Fiscal a pidi durante e caso. 

E CASO

Hues durante tratamento di e caso di asesinato di Camilo Sosa diabierna mainta den corte, a mustra cu dia 2 September 2018, e victima Camilo tabata hunto cu su amigonan riba e parking lot patras di Sand Bar. Camilo a mira Paskel y a bisa su amigonan cu Paskel a horta su auto. El a bay reclama Paskel y nan a bringa. Tres di e amigonan a yuda Camilo bringa contra Paskel. Paskel lo a cay y su t-shirt a kibra. Paskel a lanta y kita su t-shirt. Hues a bisa cu riba imagennan di camera di seguridad Polis a mira con Paskel y e otronan cu tabata hunto Camilo, tabata haci movecion manera ta bay sigui bringa pero nada no a sosode. Hues a bisa cu mirando cu e imagennan ta hororoso e no kier pasa esakinan riba pantaya pa tur hende den sala mira. Fiscal a bisa Hues cu e si kier pa confronta Paskel cu esakinan pero cu lo pasa e imagennan riba laptop di Fiscal dilanti Hues y Paskel lo bay dilanti mesa hunto cu su abogado pa mira esakinan. Hues a sigui bisa cu un rato despues Paskel a bay y Camilo cu dos amigo tabata canando. Diripiente ta mira Paskel ta core bay riba Camilo y tabata haci movecion di hinca  y a core bay. E amigonan a core tras di Paskel y Camilo ta zak den otro.

FISCAL

Fiscal a bisa cu si Paskel a hinca Camilo e momento ey, por papia di defensa propio pasobra tabata 4 contra 1. Pero envez di Paskel bay cas, el a bay pasa na e parking lot. El a sali for di e auto cu un cuchiu y a core bay riba Camilo y a hink’e y core bay. Fiscal a mustra cu den menos cu 5 minuut cu Paskel a cana bay despues di e pelea y a bolbe den pick up y den menos cu 1 minuut a hinca Camilo. Fiscal ta haya cu e periodo di 6 minuut cu a pasa ta masha cortico pa bisa cu Paskel por a pensa promer cu el a bolbe. Fiscal a sigui bisa cu Paskel a bisa Camilo “abo ta bay h… awor”. Fiscal ta haya cu Paskel tabatin intension di mata. El a performa e pulmon y curazon di Camilo.

El a exigi 12 aña di prison. Pa loke ta demanda di M.C., Fiscal ta haya cu no a argument esaki. El a pidi Hues pa rechaza esaki. Fiscal a bisa cu e famia di e victima si a argumenta e gastonan di entiero. Daño inmaterial ta mustra cu e mayornan di e victima tabata bou tratamento pa e perdida di nan yiu. Fiscal a pidi Hues pa aproba e demanda di en total 45 mil florin.