Trabou ta avansando pa e cinema nobo den Teatro Principal

ORANJESTAD – E trabounan na San Nicolas pa e cinema nobo den Teatro Principal na San Nicolas ta avansando. Informacion cu NoticiaCla tin, ta cu cos ta canando bon, y dentro di poco mester ta asina leu cu por anuncia e apertura di e cinema renoba aki. E fecha exacto no ta conoci ainda. Manera cu NoticiaCla a present’e como un primicia caba, algun tempo atras a presenta e noticia cu planificacion a inicia pa locual lo bira construccion di un cinema cu tres sala, situa den Teatro Principal. E noticia a cay den bon tera principalmente cu comunidad di San Nicolas. E balor di e proyecto por wordo estima na 3.5 miyon florin si considera tur cos.

EMOCIONANTE

“E proyecto di Teatro Principal ta hopi emocionante pa varios motibo. Na augustus 1992  e teatro aki a cera su porta despues di masha hopi aña di existencia ora cu economia di nos pais tabata  malo, y peliculanan tabata yega Aruba laat compara cu nan estreno na Merca,” sr. Eddie de Veer, CEO  di MetaCorp a splica e tempo ey. E reaccionnan riba rednan social den cuadro cu e noticia aki ta hopi grandi. Diferente hende a expresa nan gratitud na MetaCorp pa e gran iniciativa aki, como tambe pa yuda stimula movecion economico na San Nicolas. E potret ta di e trabounan actual  tumando lugar den e interior di un di e salanan di e cinema nobo.