Hulanda y Aruba a acorda pa wanta e tema di LAFT te despues di reces

DEN HAAG – Aruba y Hulanda a yega na palabracion diabierna den Rijksministerraad pa loke ta e ley di LAFT. E palabracion ta cu no ta tuma ningun decision awor, sino mas bien ta ‘houd aan’ e agenda punt y ta trate den e proximo RMR despues di reces, cu ta aki 6 siman. Asina NoticiaCla a compronde di su fuentenan na Hulanda. Cu esaki, Aruba ta haya alivio un biaha mas, y no ta haya su mes cu un posibel decision di RMR contra dje, manera tabata e posibilidad. Loke a sosode ta cu tabatin un ‘intervencion’ prome cu e reunion tuma lugar, cu ayudo di prome minister Evelyn Wever cu a bula bin di Suiza un rato pa atende esaki tambe. A logra cu por lo pronto, e ‘agendapunt’ ta ‘afgevloeid’, y cu lo duna espacio pa yega na un tipo di areglo, durante e periodo di receso. Ora cu RMR tene su proximo reunion, lo trata e tema un biaha mas y eynan lo tuma un decision definitivo, kico ta pasa cu e ley di LAFT. 

FIRMA OF NO

Mientrastanto e ley nobo di LAFT no ta firma ainda, y e siguiente discussion awor ta bay bira, si Aruba ta firma e ley si of no. Esey tin cu sosode entre gobierno di Aruba y Gobernador di Aruba. NoticiaCla a compronde cu na regreso pa Aruba, Parlamento y Gobierno lo atende cu esaki, pa wak si ta ‘houd aan’ e ley of no. A toca e tema aki si na Hulanda, pero no a dicidi formalmente. A compronde cu ta keda na Aruba si ta firma esaki y esey no ta algo cu Hulanda por dicidi. Di otro banda, RMR ta esun cu tin cu tuma un decision final. Pues mirando e situacion, Aruba lo tin cu tuma e decision dentro di pronto, y despues wak con Hulanda ta reacciona riba e tema.