Rijkswet Koninkrijksgeschillen a keda aproba cu amienda awe marduga

DEN HAAG – Despues di 10 aña di discussion, diabierna marduga, por fin Tweede Kamer a aproba e Rijkswet Koninkrijksgeschillen, cu amienda. Y ta parse cu gobierno di Hulanda por haya su mes den esaki. Esaki ta nifica tambe cu den futuro, ora cu tin un disputa entre Hulanda y e islanan di Reino Hulandes, no ta sin mas cu Hulanda por dicidi, sino cu tin un proceso awor cu tin cu cana pa e 'disputa' wordo resolvi. No ta exactamente e formato cu tur partido tabata kier, pero esun mas cerca di e contenido anterior segun propone pa e.o. e islanan di Reino Hulandes. A tuma basta ‘lobbymento’ pa por a haya suficiente sosten di tur parlamentario pa por a pasa esaki.

ARUBA INSTRUMENTAL

Den esaki Aruba tabata instrumental ya cu un di e amiendanan tabata di presidente di parlamento di Aruba, Ady Thijsen. Ta trata e amienda Thijsen cu ta institui cu e ‘Afdeling Koninkrijksgeschillen’ cu a wordo aproba. E ‘Afdeling’ aki mester wordo crea si door di cambio di WRvS (Raad van State). 

MAS AMIENDA

E partido ChristenUnie a entrega un amienda cu ta duna minister plenipotenciario e opcion pa e mes entrega un disputa na Raad van State den caso cu presidente di Rijksministeraad (RMR) no kier. Presidente di RMR tin e competencia pa determina si tin di haber di un disputa of no. De hecho e ta un extencion di e procedura di articulo 12. 

Tambe e amienda di Parlamentarionan Diertens/Kuikens a wordo aproba cu ta crea e cuadro pa e “zwaarwegende gronden” unda cu RMR no por desvia:  Esaki a algo estrictamente huridico, procedural y cu circumstancianan cu por cambia.   

Tambe Tweede Kamer a aproba e mocion di parlamentario van Laar. Esaki ta bay trece yen di discusion riba e tema di ‘koninkrijksaangelegenheden’ y ‘landsaangelegenheden’. Esta ki ora un tema ta cay bou di competencia di Reino y ki ora e ta cay bou di competencia di e respectivo pais mes. Mas den  curso di dia lo tin mas informacion riba e resultado di e votamento aki. Por mira e proceso di voto completo AKI.