Diabierna Gobierno di Aruba ta presenta e LAFT nobo na RMR

DEN HAAG/ ORANJESTAD – Diabierna awor Gobierno di Aruba ta presenta e ley nobo di LAFT formalmente na Conseho di Minister di Reino (RMR) na Den Haag. Minister Plenipotenciario di Aruba na Hulanda, Guilfred Besaril a confirma esaki pa NoticiaCla.com diahuebs atardi. Mester bisa cu e noticia aki a bin for di fuentenan na Corsou. A base di esey, e portal aki a acerca e mandatario, cu a confirma e informacion e ora. Mas cu esey e no por a bisa. Segun e protocol entre e paisnan, y tambe confirme declaracion di prome minister Evelyn Wever, Aruba ta presenta e ley na RMR pa nan reaccion y comentario. Y esey ta sosode diabierna. Kico ta pasa despues, no ta conoci. 

CAMBIO

Manera ta conoci, tabata 6 di juni ultimo cu parlamento di Aruba a pasa e ley di LAFT, pero cu un amienda basta grandi cu a cambia gran parti di e ley. E cambio mas grandi ta cu enbez di raporta na RMR, e colegio di supervision financiero CAFt ta raporta awor na gobierno y Parlamento di Aruba. Algo cu tanto CAFT como gobierno Hulandes no a aprecia. Secretario di estado Knops ta spera problema internacional riba tereno financiero pa Aruba, y e siman aki a plantea e situacion di CAFT como un ehempel, si e concepto di ley di geschillenregeling pasa manera cu e ta aworaki, cu no ta algo bon. Lider di fraccion di MEP Rocco Tjon a sigura e portal aki cu nada no a cambia cu e ley, ya cu CAFT ta keda mescos den sentido cu su tarea di sigui controla no a cambia. Ta solamente e instancia na ken nan tin cu raporta, a cambia awor. 

RMR

Mayan, diabierna ta e ultimo session di RMR prome cu nan drenta recess, durante cual e carta aki lo wordo entrega y trata tambe posiblemente. No ta conoci si Aruba lo haya un reaccion mesora di RMR riba e ley di LAFT, pues esey tin cu spera warda wak kico ta sosode. Tambe mayan ta e reunion unda cu Corsou ta haya sa si RMR ta dicidi di duna e isla un aanwijzing si of no. Informacion cu e portal aki tin, ta cu ta mustra den direccion cu e lo haya uno, aunke no tin e detayes.