Reto legal tin Aruparking stroba pa introduci sistema nobo di multa

ORANJESTAD- Casi dos aña despues cu gobierno anterior a para e sistema di multa ciudadanonan cu viola reglanan di Aruparking, ainda no tin ningun otro sistema ‘in place’ cu por ‘multa’ un persona si e viola e reglanan. Y for di e comentario di e director nobo di Arubus, responsabel pa Aruparking, Edwin Mohamed na NoticiaCla, no tin un fecha pa introduci e cambionan aki. Otro cos cu Mohamed a confirma na e portal aki, ta cu e situacion aki ta perhudicando e compania severamente y cu nan ta perdiendo hopi placa. Danki na e ‘accionistanan principal’ cu ta gobierno, cu ta yena e buraco aki pa e compania por sobrevivi. Mohamed no por a duna cifra pa ilustra ki impacto e tabatin, pero a bisa si cu e ta masha hopi mes. 

CAMBIO

Manera por corda, for di momento cu e tempo ey minister di Turismo y Transporte Otmar Oduber a retira, y cu e partido na mando e tempo ey (AVP) a tuma e cartera over, a dicidi cu no ta bay multa hende mas si 1. Nan tempo di parkeer vence’, 2. Y tampoco takel auto pa e motibo ey. Esey tabatin como consecuencia cu si legalmente no tin forma di multa un persona, si e persona viola e regla ey, e ta sali di bon. Y segun Mohamed, hopi hende ta probechando di e ‘loophole’ aki. Pues, si bo no kier paga, of a paga mes, y bo tempo pasa, no tin ley pa dunabo un multa. Di otro banda, si bo parkeer malo, si por takel e auto y cu e consecuencianan cu esaki por tin pa e chauffeur. Por lo pronto pues, e loophole aki ta sigui funciona. 

LEY

Segun Mohamed, a resulta cu mester ta hopi cuidadoso ora cu ta anda cu ley, ya cu cada palabra mester wordo scrutina, pa no haya problema. Y aki ta unda cu tin tardansa den e proceso. No por sali afo ainda kico mester ta e miho forma di multa, sin cu e ta crea un problema tanto pa gobierno, y ta bira un martirio pa e ciudadano. Afterall, ta debi na e tantisimo kehonan cu tabatin pa cu e proceso di takel y multa hende, cu gobierno a opta pa actua y para esaki mesora. Un zet politico, cu awor ta costando e compania mes hopi placa.