Aruba Airlines lo bula di Venezuela pa Miami cu Aruba como transito

ORANJESTAD – Tur cos a keda cla y Aruba Airlines a haya permiso special pa cuminsa cu buelonan for di Venezuela (Valencia) pa Merca, cu un stop na Aruba di transito. Asina operations manager Frank Arends a bisa NoticiaCla  den forma di primicia. E anuncio official mes lo mester bin di gobierno di Aruba mas laat. E intencion ta pa entrante 21 di juli, e aerolina transporta pasaheronan pa Merca, cu un parade na Aruba, unda cu e pasaheronan ta pasa como transito, y sigui pa Merca. Y mesun cos for di Merca pa Venezuela. E intencion no ta pa pasaheronan aki keda na Aruba. 

PREOCUPACION 

Segun Arends, gobierno tabata un poco resistente inicialmente pa e idea, mirando cu tin miedo cu e pasaheronan aki por baha y mesora pidi asilo politico, creando mas problema. Sinembargo, Arends a sigura cu e mecanismo ta ‘in place’ pa evita esaki. Prome cu un pasahero por subi e avion, e mester demonstra cu e tin un visa Mericano y firma un documento cu ta distancie di cualkier otro intencion, esta un estilo di ‘waiver’. Tanten cu e pasahero no firma esaki, e no ta wordo permiti abordo. Fuera di esey, tin e control di 72, 48 y 24 ora, unda cu por check e pasahero su backround. Pues tin tur cos sigura cu e pasahero aki no hinca den su cabez pa baha na Aruba y keda na Aruba y pidi asilo. 

OPERACION

E motibo pa a acerca gobierno di Aruba cu e peticion aki, tabata pasobra e situacion di e aeroliña ta di tal indole cu no por keda cu un avion para sin por bula, mientras cu ta pagando pe si, incluyendo un tripulacion completo. Pues e ta generando gasto sin cu ta ricibi entrada pe. A raiz di esey, gerencia di e aeroliña a acerca gobierno cu e peticion aki pa e permiso special. Despues cu e fronteranan tabata cera pa 3 luna, y a habri bek brevemente, ya caba e aeroliña tin 4 luna caba bayendo pa 5 luna cu no a bula mas pa Miami. Esey ta costa e aeroliña placa, pero tambe e posibilidad cu ta perde e derecho di aterisahe na Miami. Si bo no bula e ruta pa un periodo di tempo, Merca ta kita e derecho di aterisahe ey. Gobierno y e aeroliña tin un luna caba na mesa cu e aeroliña unda cu e ultimo aki ta purbando pa convence e gobierno. A logra haci esaki aunke cu tin cierto resistencia ainda, di parti di gobierno. Como tal a percura pa sigura cu tin condicionan serio pa garantisa trankilidad. E condicion entre otro ta cu e pasahero mester tin un pasashi ida y buelta, visa Mericano y un documento estilo Waiver, cu no por pidi asilo politico. 

BENTA DI PASASHI

A duna e fecha di dia 21 di juli pa por prepara pa cuminsa bende pasashi. E demanda segun Arends, ta grandi for di Venezuela, ya cu e gastonan aworaki pa biaha di Venezuela pa Merca ta hopi mas caro, cu via Aruba. Cu e cambio aki, e ta funciona pa alivia e trafico aki, y tambe pa e aeroliña genera entrada pa sigura cu tur hende na e aeroliña por sigui mantene nan trabou y tambe sigui mantene e avion Airbus 320 cu ta ultra caro segun Arends. Ta spera cu mas den atardi, gobierno lo haci e participacion official. 

CONTENTO

Pa loke ta e trahadonan, esakinan ta contento mirando cu e posibilidad aki ta trece trankilidad bek,  ya cu esaki ta nifica cu no mester haci ahusto laboral, y cu tur hende por keda traha. Tanto e compania como gobierno a haci e intentonan pa sigura e cuponan di trabou pa asina e trahadonan por sigui labora trankil.